БКЭ (ЕГЭ) тутууга бэлэмнэнии үлэлэр ыытыллаллар

Ааптар: 
Бөлөххө киир:

Бэс ыйын 16, 25, 26 күннэригэр судаарыстыбыннай эксээмэннэри тутар пууннарга эксээмэни тутуу  ньымаларын бэрэбиэркэлээн, тургутан көрүөхтэрэ. 

Оттон, бэс ыйын 29 күнүгэр, үөрэнээччи кыттыыта суох, биир кэлим эксээмэн (ЕГЭ-ни) ыытыллар ньыматын уонна тиһиктэри көрүөхтэрэ. Бу коронавирус дьаҥын бохсор, ыарыыны тарҕаппат туһуттан маннык үлэлэр ыытыллаллар.  

Маны сэргэ, билигин тэйиччи олорууттан саҕалаан, дезинфекциялыыр, дьаҥтан харыстыыр тэриллэринэн, рециркулятордарынан (салгыны ыраастыыр тэрил), ыраахтан кыраадыһы кээмэйдиир термометрдарынан, биирдэ туттуллар уу иһиттэринэн хааччыйыы боппуруостара быһаарыллаллар. Биллэн турар, дойдуга сүрүн эксээмэни тутууга бэлэмнэнии боппуруостара Үөрэҕирии министиэристибэтигэр ымпыгар-чымпыгар тиийэ көрүллэллэр.

СӨ Үөрэҕин уонна наукатын миниистирэ Михаил Сивцев, быйыл эксээмэннэргэ Роспотребнадзор ирдэбилинэн, бэйэ икки ардыгар 1,5-лыы миэтэрэлээх социальнай дистанция хайаан да тутуһуллуохтааҕын этэр. Ону толорор туһуттан, оҕолору саахымат бэрээдэгинэн, бэйэ-бэйэлэриттэн тэйиччи олордуохтара. Бу иһитиннэрии бары улуустарга тиэрдиллибит. 

Үөһээ Бүлүү улууһугар экзамены тутар пууннарга быйыл оскуоланы бүтэрэр 98 үөрэнээччиттэн, биэс былырыыҥҥы выпускниктан уонна атын үөрэх кыһаларыттан БКЭ туттарарга сайабылыанньалар киллэриллибиттэр.

Улуустааҕы үөрэҕирии салаатын салайар  Спиридон Борбуев этэринэн, эксээмэн тутар пуунар бары ирдэнэр тэриллэринэн хааччыллыбыттар.

Эксээмэни тутар хамыыһыйа чилиэннэрэ дистанционнай үөрэҕирии ньыматынан бары ирдэбиллэри үөрэттилэр, ол туһунан сертификаттар туттарылыннылар. Эксээмэн матырыйааллара ыам ыйын 18 күнүгэр кэлбиттэрэ. Коронавирус кутталын учуоттаан элбэх үлэ ыытылынна. Быйыл 11 кылааһы бүтэрбит уонна үрдүк үөрэххэ туттарсар баҕалаах оҕолор БКЭ (ЕГЭ) туттарыахтара. Тохсус кылааһы бүтэрбит 348 оҕо уонна 11 кылааһы түмүктүүр 250 оҕо үөрэҕи бүтэрбиттэрин туоһулуур аттестаты ылыахтара, — диэтэ. 

Биир кэлим судаарыстыбыннай эксээмэннэр туһунан СӨ Үөрэҕирии министиэристибэтигэр 42-10-46, 8(924)599-32-12 төлөпүөннэргэ эрийэн сиһилии ыйыталаһыаххытын сөп.

Егор Карпов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0