Уопсастыба Эдэр саас

БКЭ былааннаммыт араспысаанньанан ыытыллар

БКЭ туттарар пууннарга коронавирус дьаҥын утары миэрэлэр ылыллалларын түмүгэр, эксээмэннэр кыраапыктарынан ыытыллаллара дойду үрдүнэн харгыстаммат. Бу туһунан ТАСС РФ Үөрэҕирии министиэристибэтигэр сигэнэн иһитиннэрэр.

«Судаарыстыбаннай түмүктүүр аттестация бигэргэтиллибит араспысаанньаҕа олоҕуран былааннаммыт эрэсииминэн ыытыллар. Үөрэх эрэгийиэннээҕи управлениеларыгар федеральнай өйөбүл тиһиктээхтик оҥоһулларынан, эксээмэннэр кэмнэригэр үөрэнээччилэр доруобуйаларыгар куттал суох буолуутун үлэтэ ситимнээхтик тэриллэр. Ол түмүгэр, дойду үрдүнэн, ол иһигэр Москваны киллэрэн туран, БКЭ кыраапыга тутуһуллар», — диэн иһитиннэриигэ этиллэр.
Эксээмэннэр штатнай эрэсииминэн ыытыллаллара бэлиэтэнэр.
«Эксээмэннэр ыытыллар аудиториялара, сирдэрэ, хайаан да дезинфекцияланаллар, салгылатыллаллар. Оттон эксээмэннэргэ хайаан да бэйэ-бэйэттэн тэйиччи олоруу, киирии, тахсыы ураты усулуобуйата тутуһуллаллар. Бэйэни харыстанар сириэстибэлэринэн, антисептиктарынан хааччыллаллар», — диэн эбэн этиллэр.
СӨ Үөрэх уонна наука министиэристибэтин иһитиннэриитинэн, 2021 сылга өрөспүүбүлүкэҕэ эксээмэни туттарар 231 пуун, итинтэн доруобуйаларынан хааччахтаах оҕолорго 7 пуун үлэлиир. Дьокуускайга — 21 пуун, баара бэлиэтэнэр.
0
0