Быйылгы биир кэлим эксээмэн тэрээһинэ коронавирус дьаҥа туран улаханнык уларыйда. Ол курдук, БКЭ туттарааччылар бэйэ-бэйэлэриттэн балтараа миэтэрэ тэйиччи, мааскалаах бэрчээккилээх олорон толоруохтара. Таатта улууһун Ытык Күөл нэһилиэгэр БКЭ-ҕэ бэлэмнэнии үлэтэ эрдэттэн ыытыллыбыта. Сарсын, от ыйын 3 күнүттэн, БКЭ саҕаланар.
Кэскил Бочонина, Тааттатааҕы лиссиэй 11 кылааһын үөрэнээччитэ:
— Мин омук тылын, обществознание уонна нуучча тылын туттарабын. Дьаҥ туруута эксээмэҥҥэ бэлэмнэниини харгыстаата. Ол эрээри туох барыта бэйэбититтэн улахан тутулуктаах. БКЭ хойут саҕаламмыта куһаҕан. Атын эбитэ буоллар билигин номнуо оскуоланы бүтэрбит буолуо этибит.
Максим Андреев, Тааттатааҕы лиссиэй 11 кылааһын үөрэнээччитэ:
— Мин нуучча тылын уонна саха тылын туттарабын. Мааска, бэрчээкки кэтэри улахан мэһэй оҥостубаппын. Дьиэбэр олорон ZOOM нөҥүө туох баар консультацияны холкутук үөрэтэ олоробут.
Лариса Эверстова, төрөппүт:
— Мин санаабар, быйылгы БКЭ элбэх мэһэйдэрдээх буолла. Хойут туттарыы, ону таһынан оҕо уйулҕатын туруга эмиэ улахан суолталаах. Дьаҥ турбатаҕа буоллар оҕолор санааларыгар да чэпчэки буолуо этэ.
Екатерина Игнатьева, төрөппүт:
— Төрөппүт быһыытынан мин олус долгуйабын. Бэйэм эксээмэн туттарар курдукпун. Ханнык да түгэҥҥэ киһи барытыгар бэлэмнээх буолуохтаах.
Саина Сергеева, Таатта улууһун иһинэн БКЭ эппиэтинэстээҕэ:
— Быйылгы эксээмэҥҥэ ыарыыттан харыстанартан ураты атын уларыйыы суох. Таатта улууһугар уопсайа 178 оҕоттон 103 оҕо БКЭ-ни туттарыаҕа. Ону сэргэ онлайн кэтээн көрөөччү (наблюдатель) диэн дуоһунас баар буолла.
Уйгулаана Бочонина, edersaas.ru