Олунньу 3 күнүттэн “Төрөппүттэр БКЭ-ни туттарар биир күннэрэ” диэн Бүтүн Арассыыйатааҕы аахсыйа саҕаламмыта. Саха сирэ тустаах тэрээһиҥҥэ 2017 сылтан көхтөөхтүк кыттар. Бу иннинээҕи сылларга төрөппүттэр нуучча тылыгар, математикаҕа эксээмэннэри туттарбыттара. Быйыл устуоруйаҕа холонон көрүөхтэрэ.
СӨ үөрэҕин уонна наукатын миниистирэ Владимир Егоров аахсыайа иитинэн сыл аайы эксээмэн туттарар. Ааспыт сылларга СӨ култууратын уонна духуобунай сайдыытын миниистирин солбуйааччы Марина Силина, спортсмен Леонид Спиридонов, ырыаһыт Варя Васильева-Максима, тэлэбиидэнньэ ыытааччыта Иван Луцкан, артыыс Евгений Пивоваров, Хаҥалас улууһун Ой оскуолатын кытай тылын учуутала Марк Бабатунде, о.д.а. кыттыбыттара.
Аахсыйа сүрүн сыалынан – оскуоланы бүтэрээччигэ көмөлөһүү, төрөппүккэ уонна уопсастыбаннаска эксээмэн хайдах быһыылаахтык барарын илэ харахтарынан көрдөрүү буолар. Ханнык баҕарар эксээмэҥҥэ оҕо уйулҕа өттүнэн бэлэмнээх буолара туһалааҕын уруккуттан ыйаллар. Маныаха дьиэ кэргэн, төрөппүт көмөтө улахан оруоллаах диэн исписэлиистэр бэлиэтииллэр. Онон төрөппүт эксээмэн хайдах быһыылаахтык барарын бэйэтинэн көрөн сүбэ-ама буолара ордук диэн этэллэр.
Быйылгы 2020 сыл Арассыыйаҕа Өйдөбүнньүк уонна албан аат сылынан биллэриллибитэ. Онон сибээстээн, быйыл эксээмэн кыттыылаахтара аан маҥнай устуоруйаҕа эксээмэн туттарыахтара. Аахсыйа кулун тутар 2 күнүгэр диэри ыытыллар.
Людмила ПОПОВА, edersaas.ru