СӨ Aйылҕа харыстабылын министиэристибэтэ 2006 сыллаахха Канадатааҕы «Elk Island» национальнай пааркаттан Саха сиригэр аан маҥнай 30 бизону, оттон 2011 уонна 2013 сылларга эмиэ итиччэ кыылы аҕалбыттара.
edersaas.ru
Саха сиригэр сэлии үйэтин саҕана үөскүү сылдьыбыт бизоннары «Уус-Буотамаҕа» уонна Горнай улууһугар «Тыымпынайга» олохтообуттара. Билигин 180 бизон баар.
Сэтинньи 23 күнүгэр «Сиинэ» айылҕа пааркатыгар бизоннары ыытыы бэлиэ тэрээһинигэр Ил Дархан Егор Борисов кыттыыны ылла. Бу кыыллары айылҕаҕа көҥүл ыытыы Арассыыйаҕа Экология сылын биир дьоһун суолталаах түгэнинэн буолар диэн Егор Афанасьевич этэн туран: «Бу аан дойдутааҕы таһымнаах бырайыак. Бу кыыллар Саха сиригэр плейстоцен кэмигэр үөскээн ааспыттара. Биһиги исписэлиистэрбит, экологтарбыт, учуонайдарбыт көмөлөрүнэн бизоннар историческай дойдуларыгар эргилиннилэр», – диэн эбэн эттэ.
Тэрээһиҥҥэ СӨ Айылҕа харыстабылын миниистирэ Сахамин Афанасьев, экологтар, Горнай улууһун олохтоохторо кыттыыны ыллылар.
Анивера Акимова, edersaas.ru