Быйылгы ситэриилээх былаас отчуотугар СӨ Инвестиция сайдыытын уонна предпринимательство дьыалатын миниистирэ Антон Сафронов арктическай улуустарга сырытта.
edersaas.ru
Ханна сылдьан тугу билбитин-көрбүтүн миниистир фейсбук уонна инстаграмм социальнай ситимнэригэр «сылааһына» сиһилии кэпсиирэ олус кэрэхсэбиллээх.
Ол курдук, Антон Сафронов Чокурдааахха үрдүкү кылаас оҕолорун кытта көрүстэ. Кини спортивнай саалаҕа ыччаттары уонна үөрэнээччилэри мунньан, хоту дойдуга дьоҕус бизнес сайдыытын туһунан кэпсэттэ.
Сэлии муоһун хомуйан туһаҕа таһаарыы — биир суолталаах боппуруос. Арктическай улуустарга сылдьан миниистир бу хайысхаҕа үлэлэһэр дьону кытта сирэй көрсөн кэпсэттэ, кинилэр санааларын уонна толкуйдарын билистэ.
Абый улууһугар Кэбэргэнэ нэһилиэгэр миниистир олохтоохтору кытта анаан көрүстэ. Манна кини урутаан сайдар территориялары сайыннарыыга туспа көрүүлээх Лидия Черемкинаны кытта көрсөн, олохтоох ыччаттары үлэлээх оҥорууга санаатын атастаста.
Ыраах арктическай улуус олохтооҕо промышленнай бырайыактары олоххо киллэриигэ Абый улууһугар баар биэс ураты харыстанар сир-уот баарын учуоттуурга санаатын тиэртэ. Миниистир Антон Сафронов Лидия Черемкинаны арктическай улуустарга урутаан сайдар территориялары сайыннарыыга сыһыаннаах бопуруостары быһаарар бөлөх састаабыгар киллэриэхпит диэн социальнай ситимнэргэ санаатын суруйда.
Онон ситэриилээх былаас отчуотугар сылдьан, быыс булан урбаанньыттары , үлэтэ суох дьону, хотугу арктическай улуустарга дьоҕус бизнеһи сайыннарыыга миниистир Антон Сафронов олохтоох кэпсэтиилэри ыытта.
Елена ПОТОЦКАЯ, «Саха сирэ» хаһыат, edersaas.ru