Бизнес сайдыытын ырытыыга улуус урбаанньыттара кыттыахтара
Быйылгы сылга Ил Дархан Егор Борисов дьоҕус уонна орто бизнеһи сайыннарыыга уонна Саха сиригэр инвестицияны тардыыга биэс улахан мунньаҕы ыытта.
edersaas.ru
Соторутааҕыта буолан ааспыт өрөспүүбүлүктээҕи предпринимателлэр бөдөҥ тэрилтэлэрин бэрэстэбиитэллэрэ киэҥ ыҥырыылаах мунньахха өрөспүүбүлүкэ Аҕа баһылыгын кытта алтынньы уонна сэтинньи ыйдарга дьоҕус уонна орто бизнес сайдыытыгар туһуламмыт 12 тус сыаллаах хайысхалар олоххо киириилэрин ырыттылар.
Ол курдук, Ил Дархан бэлиэтээбитинэн, 2018 сылтан сир учаастактарын докумуоннарын толоруу Росреестртан Элбэх функцияны оҥорор кииҥҥэ (МФЦ) бэриллиэҕэ. Государственнай уонна муниципальнай өҥөлөрү оҥорор кииннэр «Биир түннүк» режиминэн үлэлээһиннэрэ биллэ кэҥиэҕэ.
Инвестиционнай сайдыы уонна предпринимательство миниистирэ Антон Сафронов дьоҕус уонна орто бизнес эйгэтигэр үлэлиир олохтоох предпринимателлэргэ чэпчэтии уонна өйөбүл оҥорорго туох үлэ барарын туһунан билиһиннэрдэ.
Ол курдук, тутууну ыытыыга бэриллэр көҥүл урукку сылларга 157 күн кэтэһиллэр эбит буоллаҕына, эһиилгиттэн 84 күн буолуоҕа. Баайы-дуолу регистациялааһын 17 күн оннугар 9 күн устата барыаҕа.
Маны тэҥэ олохтоох предпринимателлэр бородууксуйаларын батарыыга «АЛРОСА» АК, «Таас-юряхНефтегазодобыча» ХЭТ (British Petroleum (BP) уонна «Анаабыр алмаастара» акционернай тэрилтэ курдук бөдөҥ сакаасчыттар кэккэ контрактарга илии баттастылар. Бу үлэ — миниистир Антон Сафронов тус бэйэтинэн промышленнай бөдөҥ тэрилтэлэр салалталарын кытта дьоҕус уонна орто бизнес эйгэтин үлэһиттэриттэн атыылаһыы кээмэйдэрин улаатыннарыыга кэпсэтиитин түмүгэ.
Маны тэҥэ миниистир өссө биир ситиһиинэн «Якутэнерго», «Сахатранснефтегаз» уонна «Водоканал» курдук суолталаах тэрилтэлэр иһитиннэриилэрэ судаарыстыбаннай өҥөнү оҥорор www.e-yakutia.ru интернет-порталга холбонуулара буоларын бэлиэтээтэ. Ону таһынан Арассыыйа биир бөдөҥ регионугар — Саха сиригэр инвестордар болҕомтолорун тардар матырыйааллар www.investyakutia.com сайтка хото бэчээттэниэхтэрэ.
Предпримателлэри кытта кэпсэтиигэ Ил Дархан Егор Борисов маннык уопсастыбаннай истиилэргэ улуустартан бэрт аҕыйах урбаанньыт кыттарын бэлиэтээтэ:
— Дьоҕус уонна орто бизнеһи сайыннарыыга өрөспүүбүлүкэ салалтата уонна предпринимателлэр биир хайысханы тутуһан үлэлээтэхпитинэ үгүһү ситиһиэхпит. Сырыы аайы көннөрү кэпсэтэн эрэ баран тарҕаһан хаалартан туох да көдьүүстээх хамсааһын тахсыа суоҕа. Онон мантан инньэ маннык ырытыы мунньахтарга инвестиция сайдыытын уонна предпринимательство министиэристибэтэ улуустартан бизнес эйгэтигэр үлэлиир урбаанньыттар ахсааннарын элбэтэрэ наада, — диэн санаатын тиэртэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — интернеттэн.