Бүгүн, олунньу 7 күнүгэр дойду үрдүнэн Бизнес-үөрэхтээһин күнэ аан бастаан бэлиэтэннэ.
Елена ПОТОЦКАЯ, «Саха сирэ» хаһыат, https://edersaas.ru
— Саха сиригэр “Бизнес-оскуола” автономнай тэрилтэ дьоҕус бизнес эйгэтигэр бэйэлэрин суолларын саҥа тэлэн эрэр дьону ырыынак сайдыытын араас боппуруостарыгар үөрэппитэ 15 сыл буолла. 2013 сылтан ыла бу тэрилтэ өҥөтүнэн туһнааччы ахсаана элбээн иһэр. Ол курдук, сыл аайы бизнес оскуола базатыгар 8 тыһ. тахса бэйэ дьыалатын саҕалаабыт, дьоҕус бизнес эйгэтигэр атаҕар бигэтик үктэммит урбаанньыттар, устудьуоннар, оскуола оҕолоро материальнай базаны бөҕөргөтүүгэ, үп уонна экономика боппуруостарыгар бэйэлэрин билиилэрин хаҥаталлар, — диэн кэпсиир өрөспүүбүлүкэтээҕи “Бизнес-оскуола” дириэктэрэ Наталья Хоренко.
Кэрэхсэбиллээҕэ баар, Ил Дархан Егор Борисов 2012-2016 сыллардааҕы Ил Түмэҥҥэ туһаайыытын олоххо киллэриинэн сибээстээн, өрөспүүбүлүкэ оскуолаларыгар бизнес-инкубатордары астылар. Бу оскуола инкубатордарыгар “Бизнес-оскуола” араас сэминээрдэри, маастар-кылаастары, дьыалабыай оонньуулары, “төгүрүк остуоллары” тэрийэн ыытар. Бүгүн Бизнес-үөрэхтээһин күнүн чэрчитинэн “Бизнес-оскуола” үлэһиттэрэ дьоҕус бизнес эйгэтигэр үлэлиир уонна бэйэ дьыалатын саҥа саҕалаан эрэр урбаанньыттарга анаан “Аһаҕас аан күнүн” тэрийэн ыыттылар.
Елена ПОТОЦКАЯ, «Саха сирэ» хаһыат, https://edersaas.ru
