Дьокуускай куоракка балаҕан ыйын 20-23 күннэригэр предпринимателлэр форумнара ыытылла турар. Бу чэрчитинэн, бүгүн «Кыайыы 50 сыла» спорт дыбарыаһыгар «Бизнес Экспо – 2017» диэн аччыгый уонна орто предпринимательствоҕа аналлаах быыстапка үлэтин саҕалаата.
Тэрээһиҥҥэ эҕэрдэ тылы СӨ инвестиционнай сайдыыга уонна предпринимательствоҕа миниистирэ Антон Сафронов: «Бу күннэргэ Дьокуускай куоракка предпринимателлэр форумнара тэрээһиннээхтик бара турар. «Бизнес Экспо – 2017» быыстапка аһыллыытынан ыалдьыттары, аччыгый уонна орто бизнес предпринимателлэрин ис сүрэхпиттэн эҕэрдэлиибин! Аналлаах тэрээһиҥҥэ сылын аайы предпринимателлэр көхтөөхтүк кытталлара махталлаах дьыала. Быыстапка былаһааккатыгар 18 улуустан 90 кыттааччы кэллэ. Бу үчүгэй көрдөрүү. Быйыл олохтоох аһы-үөлү оҥорон таһаарыыны өйүүр анал пуонда тэриллиэҕэ. Онон биһигини элбэх үлэ күүтэр, ол үтүө түмүктэри аҕалыа диэн эрэнэбин», – диэн кэпсээтэ. Анал быыстапка икки күн үлэлиэҕэ.
«Амматааҕы полуфабрика» атыылааччыта Сахайаана Васильеваттан аҕыйах тылы этэригэр көрдөспүппэр: «Биһиги бу анал быыстапкаҕа өрүү кыттабыт. Маннык тэрээһин ыытыллара олус бэрт. Киһи атыттартан элбэххэ үөрэнэр. Биһиги олохтоох бородууксуйаттан полуфабрикат аһы-үөлү оҥоробут», – диэн кылгастык кэпсээтэ.
