Бу күннэргэ өрөспүүбүлүкэҕэ Предприниматель күнүн бэлиэтээһин чэрчитинэн олохтоох оҥорон таһаарааччылар бастакы Бизнес-бэстибээллэрэ буолан ааста.
Елена ПОТОЦКАЯ, «Саха сирэ» хаһыат, https://edersaas.ru
Тэрээһин быйыл Дьокускай куорат мээрийэтин аттыгар саҥа тутуллубут Саха-Экспо Кииҥҥэ ыытылынна. Сүүнэ улахан дьиэ иккис этээскэ тахсар эскалатордаах, бэрт үгүс киһи сылдьарыгар усулуобуйа барыта тэриллибит.
“Бизнес-бэстибээл” диэн бэрт сонун тэрээһиҥҥэ 150-тан тахса бэйэ бородууксуйатын оҥорон таһаарааччы урбаанньыт кытынна. Бэстибээл бастыҥ үлэлээх урбаанньыттар кыһыл доруосканан хаамыыларыттан саҕаланна. Кэрэхсэбиллээҕэ баар, бочуоттаах хаамыыны оскуола оҕолоро саҕалаатылар
Бэстибээлгэ кыттыбыт Чурапчы улууһунааҕы Дириҥ орто оскуолатыгар уонна Мэҥэ Хаҥалас Майа орто оскуолатыгар оҕону оскуола сааһыттан дьоҕус бизнес эйгэтигэр уһуйбуттара хаһыс да сыла. Бу оскуолаларга Бизнес-инкубатордар аһыллан үлэлээн, оҕолор оскуоланы бүтэрэллэригэр бэйэ бородууксуйатын оҥорон таһаарар дьон буолан тахсаллар. Ол курдук, маһынан уонна тимиринэн уһаныыга, массыына өрөмүөннээһинигэр, үүнээйи үүннэриитигэр, ас астааһыныгар, иис ымпыгар-чымпыгар уһуйуллан, бэйэ дьыалатын хайа баҕарар тэринэр кыахтаахтар.
Дириҥ орто агро-оскуолатын үөрэнээччилэрэ оҥорон таһаарар бородууксуйаларын нэһилиэк иһиттэн көрдүүллэр эбит. Ол курдук, туох ханна оҥоһуллуохтааҕын, ким ханна туох сакаастааҕын эрдэттэн-билэ үөрэтэ сылдьаллар. Ол сайаапкалары оскуола базатыгар, мастарыскыайдарга кэлэн оҥороллор. Ол аата, оҕолор оскуолаҕа сылдьан урбаанньыт үлэтин хайысхатын билэн, сатабыллаах толкуйдаах буоларга үөрэнэллэр эбит.
Урбаанньыт Ньургуйаана Заморщикова Саха сиригэр үүнэр эмтээх оту уонна сир аһын хомуйан, бородууксуйа оҥорон, Арассыыйа таһымыгар таһаарар былааннаах. Мин Ньургуйаана Заморщикова кучу чэйин быыстапкаҕа бэркэ толкуйдаан оҥорбутун бэлиэтии көрдүм. Ол курдук, киһи манна чэйи оттон саҕалаан, хайдах оҥоһуллубутугар тиийэ үөрэтэн, бэлэм кутуллубут иһиттэргэ өссө амсайан көрөрүгэр тиийэ — барыта учуоттаммыт. Быыстапкаҕа кыттыы эмиэ араастаах. Бэйэ бородууксуйатын рекламалыы эмиэ үөрэниэххэ наада.
«Кэрэ» ателье кэлиҥҥи кэмҥэ саха таҥаһын тигиини пропагандалаан, бэйэ бородууксуйатын оҥорон таһаарыыга олохтоохтук ылсан эрэр. Ателье салайааччыта Александра Колесова Предприниматель күнүнэн сибэстээн, Ил Дархан Егор Борисов Махтал суругун тутта. Бу күннэргэ тэрилтэ үөрүүлээх быһыыга-майгыга сервис техникумун кытта дуальнай үөрэхтээһиҥҥэ дуогабар түһэрсиэҕэ. Онно бырамыысыланнас, үөрэхтээһин, инвестиция сайдыытын уонна предпринимательство дьыалаларыгар министиэристибэлэр, Эргиэн палаатата кыттыыны ылыахтара.
— Бу тэрээһин Саха сиригэр чэпчэки промышленность сайдыытыгар олугу ууруоҕа, — диэн бэлиэтиир урбаанньыт Александра Колесова.
Бэстибээлгэ кыттыбыт урбаанньыттар бэлиэтииллэринэн, маннык тэрээһин бэйэ кыаҕын, бородууксуйатын билиһиннэрии уонна көрдөрүү эрэ буолбатах. Араас быыстапка, бэстибээл бэйэ-бэйэттэн үөрэнии, уопут атастаһыы, икки өттүттэн хардарыта барыстаах сибээһи олохтуурга туһуланар. Бэстибээл саҕаланыыта бырабыыталыстыба бэрэссэдээтэлин бастакы солбуйааччы-экэниэмикэ миниистирэ Алексей Стручков биирдиилээн урбаанньыттары көрсөн санаа атастаста, толкуйдарын иһиттэ.
— «Саха сиригэр оҥоһулунна” диэн суруктаах бородууксуйа, оҥоһук Арассыыйаҕа эрэ буолбакка, аан дойдуга барытыгар тарҕанарыгар эрэнэбин. Онуоха биһиэхэ усулуобуйа барыта баар. Саамай кылаабынайа, бары эйгэҕэ сатабыллаах дьонноохпут”, — диэн бэлиэтээтэ Алексей Стручков. Салгыы кини СӨ Ил Дархана Егор Борисов олохтоох бэйэ оҥорон таһаарбыт бородууксуйата – өрөспүүбүлүкэ экэниэмикэтин сайдыытын сүрүн хайысхатынан буолуохтаах диэбитин санатан туран, өрөспүүбүлүкэҕэ 2012-2019 сылларга предпринимательство салаата сайдыытыгар туһуламмыт анал быраагыраама үлэлиирин кэпсээтэ.
Бэстибээл кэмигэр биир урбаанньыт саала ортотугар олорон туойунан иһиттэри оҥорон таһаарарын суруналыыс аймах эрэ буолуо дуо, үгүс киһи бэлиэтии көрдө. Дьиҥэр, сөптөөх толкуй эбит: маннык быыстапкалар, бэстибээллэр болҕомтону тардар соруктаах тэриллэр буоллахтара дии. Өскө бу киһи иһиттэрин остуолга тэлгэтэн баран, ким кэлэн көрөрүн кэтэһэн турбута буоллар, дьон болҕомтотун тардара саарбах этэ. Итинник туой иһиттээх дьон Өксөкүлээх Өлөксөй аатынан Норуоттар доҕордоһууларын дьиэтигэр буолар быыстапкаларга үгүс буолааччылар. Ол эрээри болҕомто киинэ кинилэргэ соччо туһаайыллыбатын бэлиэтии көрөөччүбүн. Онон элбэх киһи мустар кэмигэр бу урбаанньыт курдук бэйэҕэ болҕомтону тардар ньыманы эмиэ эрдэттэн тобулуохха баар эбит!
Бастакы бизнес-бэстибээлгэ сылдьан баран, ити курдук санаалаах тахсан бардым.
Елена ПОТОЦКАЯ, «Саха сирэ» хаһыат, https://edersaas.ru
Ааптар хаартыскаҕа түһэриитэ.