Красноярскай куоракка устудьуоннар уонна ыччаттар аан дойдутааҕы кыһыҥҥы универсиадаларыгар Саха сириттэн Дьокуускайдааҕы педагогическай колледж үҥкүүтүн ансаамбыла тэрээһин култуурунай бырагырааматыгар ситиһиилээхтик кыттан кэлбитэ. Ансаамбылы Владимир Собакин диэн эдэр киһи салайар.
Кини Чурапчы улууһун Кытаанах нэһилиэгиттэн төрүттээх, Култуура колледжын 2005 сыллаахха бүтэрэн, Тааттанан, Чурапчынан үҥкүү ансаамбылларыгар үлэлээбит. Онтон 2015 сыллаахха куоракка кэлэн, күһүҥҥүттэн Дьокуускайдааҕы педагогическай колледжка үҥкүү ансаамбылын сөргүтэн, устудьуоннары саҥаттан талан, айар үлэтин саҕалаабыт. Манна баҕалаахтар бары дьарыктаналлар. Оҕолор колледж иһигэр эрчиллэр саалалаахтар, сахалыыттан саҕалаан араас омук үҥкүүтүгэр, аныгылыы үҥкүүгэ тиийэ толороллор эбит, бэл, брейктиир уолаттар кытта бааллар.
Оттон Универсиада курдук улахан тэрээһиҥҥэ хайдах кыттыбыттарын туһунан Владимир: “Битиигэ” салайааччы буолуохпуттан араас күрэхтэһиилэргэ, тэрээһиннэргэ кытта сатыыбыт. Былырыын баччаларга интэриниэккэ Универсиада ыытылларын туһунан аахпытым уонна тэрийээччилэргэ биһигини кытыннарыҥ диэн суруйбутум. Ол сурукпар хап-сабар эппиэттээннэр, 60-ча ансаамбылтан талыллан, аҕыс иһигэр киирэммит, фольклорнай, театрализованнай туруоруубутун бэлэмнээн саҕалаабыппыт. Кулун тутар ый саҕаланыыта 19 оҕо уонна түөрт салайааччы буолан Красноярскайга көппүппүт. Кырдьык, олус улахан таһымнаах, киэҥ хабааннаах тэрээһиҥҥэ кыттан, астынан аҕай кэллибит. Норуоппут үҥкүүтүн-битиитин, ырыатын-тойугун, таҥаһын-сабын атын омуктар да, тэрийээччилэр да олус интэриэһиргээтилэр, сөхтүлэр”, — диэн ансаамбылыгар дьарыктанар оҕолорунан киэн тутта кэпсиир.
“Битиилэр” ситиһиилэрэ манан эрэ муҥурдаммат. Устудьуоннар үҥкүүгэ дьарыктанан, өрөспүүбүлүкэ да, дойду да таһымыгар кэккэ ситиһиилээхтэр.
Ансаамбыл аан дойдутааҕы үҥкүү олимпиадатыгар сэттис миэстэлээх, “Үҥкүүлүүр Саха сирэ”, “Хаар оһуордар” үҥкүү бэстибээллэрин кыайыылааҕа буолар. Үгүс былааннаах эдэр салайааччыга, ансаамбылга дьарыктанар устудьуоннарга ситиһиилэри баҕарабыт.
Айтана Аммосова.