«АЛРОСА» аан дойдуга алмааһы хостуур бөдөҥ хампаанньа 2018 сыл уон ыйыгар күндү таас атыытыттан 242,8 мөл. дуоллар киирбитин туһунан иһитиннэрдэ. Алмаас сырьетун 233,9 мөл., бирилийээни 8,9 мөл. дуолларга батарбыттар.
Бу сыл тохсунньу-алтынньы ыйдарыгар бородууксуйа атыыта 6% үрдээн, 3,905 млрд дуолларга тэҥнэспит. Уопсайа тоҕус ый иһигэр 3,822 млрд дуоллар суумалаах алмаас сырьета, 83,0 мөл. дуолларга бирилийээн атыыга барбыт.
«Кыра кээмэйдээх уонна чэпчэки сыаналаах алмаас сырьетугар алтынньыга атыы бытаан соҕус этэ. Манна дьыл кэмэ улахан оруоллаах уонна Дивали индийскэй бырааһынньык иннинэ дуолларга туһаайан рупий куурса мөлтөөбүтэ. Онтон сылтаан Индияҕа хас да дьоҕус тэрилтэ моҥкуруут барбыта, дойдуга алмааһы кырыылыыр салааны кирэдьииттээһин усулуобуйата кытааппыта барыта түмүллэн, атыыбытыгар охсуулаах буолла. Ахсынньыга уонна үүнэр сыл бастакы кыбаарталыгар балаһыанньа көнүө, харчытыгар аахтахха, былырыыҥҥы көрдөрүүнү куоһарыахпыт диэн эрэнэбит», — диир АЛРОСА генеральнай дириэктэрин солбуйааччы Юрий Окоемов.
Марианна Тыртыкова, «Саха сирэ» хаһыат, edersaas.ru