Ааспыт сылга «Тааттаҕа балтараа саастаах оҕо үлүйэн өллө», «Тааттаҕа кыра оҕолор үлүйбүт чахчыларынан холуобунай дьыала тэрилиннэ» диэн матырыйаалларга иһитиннэрбиппит курдук, Таатта улууһун Ытык Күөл сэлиэнньэтигэр 2016 сыл сэтинньи 16 күнүгэр алдьархай тахсыбыта — балтараа саастаах оҕо үлүйэн өлбүтэ, оттон кини 3 саастаах убайа илиитин-атаҕын үлүтэн, балыыһаҕа киллэриллибитэ.
Вера МАКАРОВА, «Саха сирэ» хаһыат, edersaas.ru
Бу чахчынан РФ Холуобунай кодексатын 109-с ыст. 1 чааһынан, ол эбэтэр, сэрэҕэ суохтан өлүүгэ тиэрдии бэлиэтэ баарынан, холуобунай дьыала тэриллибитэ. РФ Силиэстийэлиир кэмитиэтин Саха сиринээҕи управлениета иһитиннэрбитинэн, бу дьыала суут мунньаҕар көрүллэн, бириигэбэр тахсыбыт.
Суут быһаарбытынан, бу оҕолор аһыы утаҕы сөбүлээн иһэр ийэлэрэ кырачаан уолаттарын дьиэлэригэр соҕотохтуу хааллартаан, утуйбуттарынан туһанан, бөх тоҕо тахсан баран устунан арыгылыы барбыт. 25 саастаах ийэ бэйэтэ билиммитинэн, сарсыарда билэр киһитин дьиэтигэр уһуктубут, онуоха диэри туох буолбутун өйдөөбөт.
Быраабы араҥаччылыыр уорганнарга кыракый эрэйдээхтэр эбээлэрэ тыллаабыт — кини сэтинньи 17 күнүн сарсыардатыгар дьүөгэтиттэн кэлээт, бу ынырыктаах быһылааны илэ хараҕынан көрбүт: дьиэ аана аһаҕас, балтараа саастаах сиэнэ муостаҕа номнуо көһүйэн, оттон улахана ороҥҥо суорҕаны бүрүнэн сытаахтыыллар эбит.
Силиэстийэ быһаарбытынан, 3 саастаах оҕо таһырдьа атах сыгынньах тахса сылдьыбыт, ол түмүгэр, илиилэрин уонна тилэҕин үлүппүт. Хаарга кини илиилэрин уонна атахтарын суола хаалбыт. Дьиэ иһигэр + 7 кыраадыс эрэ, оттон таһырдьа — 30 кыраадыс тымныы эбит.
Судмедэкспертиза быһаарбытынан, кыракый оҕо тымныыттан үлүйэн өлбүт.
Силиэстийэ кэмигэр ийэ буруйун толору билиммит, кэмсиммит.
Суут кинини буруйдааҕынан билинэн, 1 сыл 2 ыйга көҥүлүн хааччахтааһыҥҥа уурбут. Бириигэбэр бүгүн, кулун тутар 3 күнүгэр, күүһүгэр киирбит.
Маныаха РФ Холуобунай кодексатын 53-с ыстатыйатын ирдэбилинэн, сууттаммыт ийэ үлэ күнүттэн ураты күннэргэ, киэһэ 20.00 чаастан сарсыарда 07.00 чааска диэри бириэмэҕэ Таатта улууһуттан барара, араас тэрээһиннэргэ сылдьара көҥүллэммэт. Итиэннэ хонтуруоллуур иниспиэксийэ көҥүлэ суох, дьиэтин, үлэтин уларытара бобуллар. Ыйга биирдэ бу уоргаҥҥа кэлэн бэлиэтэнэр.
Силиэстийэ кэмигэр «Таатта улууһа» муниципальнай тэриллии баһылыгын аатыгар буруйу оҥорууга тиэрдибит быһыыны-майгыны туоратарга ирдэбил ыытыллыбыт. Ол ирдэбил көрүллэн, 3 саастаах уолчааны оҕо саадыгар ылбыттар, кини билигин аҕатын кытта олорор.
Вера МАКАРОВА, «Саха сирэ» хаһыат, edersaas.ru