«Бириэмэ капсулатын» оскуоланы бүтэрээччилэр искибиэрдэригэр угуохтара
Дьокуускай куорат Автодорожнай уокуругар сотору кэминэн оскуоланы бүтэрээччилэр искибиэрдэрэ баар буолуоҕа.
Билигин искибиэр тула күргүөмнээх үлэ ыытылла турар. Бу кимнээх бэйэлэрин баҕа өттүлэринэн искибиэр тута сылдьар эбиттэрий?
Өрөспүүбүлүкэ оскуолаларын 1990 сыллаахха бүтэрбит оҕолор 30 сыллаах үбүлүөйдэрин уратытык бэлиэтээбиттэр. Кинилэр бары түмсэн, сүбэлэһэн кэмиэрчэскэйэ суох тэрилтэ тэриммиттэр. Бу тэрилтэ 1990 сыллаахха өрөспүүбүлүкэ оскуолаларын бүтэрбит ыччатын барытын түмэр. Бэрэссэдээтэл Алексей Петрову кытта кэпсэттим.
— Былырыын оскуоланы бүтэрбиппит 30 сылынан өрөспүүбүлүкэ оскуолаларын ити сыллаахха бүтэрбит дьонун түмэргэ санаммыппыт. Бары түмсэн бииргэ үбүлүөйдээх сылы бэлиэтиэҕиҥ диэн мустаммыт, сүбэлэһэн хас нэдиэлэ ахсын көрсөн, сүбэлэһэн үлэбитин саҕалаабыппыт. Бачча элбэх киһи хайдах ол муһуннугут диэххит. Ол эрээри саамай көхтөөхтөр, баҕалаахтар мустаммыт, былырыын 30 сылбытын бүөм соҕустук бары санитарнай ирдэбили тутуһан бэлиэтээбиппит. Ити бэлиэтээн, билсэн, доҕордоһон, араас идиэйэлээх дьон санааларын истэн баран, куоракка бэлиэ хаалларар туһунан этиилэр киирбиттэрин иилэ хабан ылан олоххо киллэрэргэ санаммыппыт. Кыргыттарбыт Теплай күөл үрдүгэр миэстэ булан мас олордуоххайыҥ диэбиттэрэ. Выпуск искибиэрин оҥоруоҕуҥ диэн этии киирбитин бары өйөөбүппүт. Хайдах гынан ити тутуутун кыайабыт диэн сүбэлэһэн баран, быһаарыныы ылыммыппыт. Олохтоох көҕүлээһини өйүүр бырагыраама сүнньүнэн биһиги бырайыак көмүскээн, өрөспүүбүлүкэттэн харчы ылан уонна бэйэбит эбии кыттыһан искибиэрбит тутуутун хайысхатынан үлэлээн саҕалаабыппыт. Уопсастыбаннай үлэ биллэн турар, уустуктардаах. Кыттыбыт эрэ киһи диэн буолбакка, бырайыакпыт ааһарыгар бары күүһү ууран үлэлээбиппит. Өрөспүүбүлүкэ араас муннуктарыгар 90 сыллаахха оскуоланы бүтэрбит оҕолор биир сүбэ буолбуппут. Куорат дьаһалтатын кытта үлэлэһэн Автодорожнай уокуругу кытта күүскэ үлэлэһэн, бырайыакпыт оннооҕор куорат олохтоохторугар куоластааһыҥҥа киирбитэ. Бырайыакпыт сыала-соруга өрөспүүбүлүкэ үрдүнэн «Выпускник искибиэрэ» диэн суоҕа буолуо. Хас биирдии киһи оскуоланы бүтэрэн олох киэҥ аартыгар үктэнэр, манна кэлэн оскуоланы, уһуйааны, орто анал, үрдүк үөрэх кыһатын бүтэрээччи оҕолор, ыччат алгыс ылан олох аартыгар бэйэлэрин суолларын тобулалларыгар күүс-көмө буолуо дии саныыбыт. Ол иһин искибиэри «Алгыстаах аартык» диэн ааттаатыбыт. Искибиэрбит аһыллыытыгар «Бириэмэ капсулатын» угуохпут. Бу капсуланы 2040 сылга оскуоланы бүтэрэр оҕолорго аныахпыт. Тоҕо ити сылы таллыгыт диэтэххэ, ити сыл биһиги выпуск оскуоланы бүтэрбиппит 50 сыла буолуохтаах. Искибиэрбит бу ыйга арыллыаҕа.
Биһиги балаҕан ыйыгар кэмиэрчэскэйэ суох тэрилтэ тэриннибит. Онтубут Саха АССР 1990 cыллаахха оскуоланы бүтэрбит оҕолор уопсастыбаннай эрэгийиэннээҕи түмсүүлэрэ диэн ааттаах. Инникитин салгыы үлэлиэхпит, саҥаны айыахпыт-тутуохпут дии саныыбын.
Ульяна ЗАХАРОВА, edersaas.ru