Светлана Александрова Нам улууһугар уонна Дьокуускайга 20 сыл устата сокуоннай саастарын ситэ илик оҕолор иниспиэксийэлэригэр үлэлээбитэ.
edersaas.ru
Билигин биэнсийэҕэ тахсыбыт милиция майора, ыччат бэлиитикэтин туйгуна бар дьонун минньигэс аһынан күндүлүүр дьарыгынан үлүһүйбүт. Үс кэрэчээн кыыс иһирэх ийэтэ Светлана Прокопьевна бэйэтэ этэринэн, бу иннинэ дьэрэкээн көстүүлээх, ураты амтаннаах бирээнньиктэри оҥорор туһунан санаан да көрбөт этэ. Ол эрэн, былырыыҥҥыттан «Уральские козули» тиэстэтинэн имбирнэй бирээнньиктэри оҥорон, кыргыттарын астыырга үөрэтэр.
«Бастаан туортан саҕалаабытым. Туорт оҥорор уустук, эбэһээт киэргэтиллиэхтээх дии саныыбын. Ол иһин, билиҥҥи үйэ сайдыытынан, көмпүүтэр нөҥүө имбирнэй бирээнньиктэри оҥорорго үөрэммитим. Үөрэнэн истэҕим аайы син туох эрэ тахсыыһык диэммин, Арассыыйа кондитердарын бөлөхтөрүгэр киирэммин, кинилэрдиин алтыһан син элбэххэ үөрэнним.
Имбирнэй бирээнньик оҥоһуута боростуой буолбатах, араастаах. Ордук киэргэтэргэ айсинг үлэтэ араастаах. Ол курдук тиэхиньикэтэ элбэх, ол иһигэр «Роспись по глазури», «Пайпинг», «Витраж» уо.д.а.
Мин син барытын баһылаатым, үөрэнним диэххэ сөп, Онон, хата кыһыммын түргэнник атаардым, саас кэлбитин билбэккэ да хааллым», – диир Светлана Александрова.
Светлана үлэлэрин инстаграмҥа, ykt.ru, ВКонтакте сырдатар буолуоҕуттан, дьон сэҥээриитин ылар. Устунан кинилэр көрдөһүүлэринэн, дьиэтигэр оҕолорго анаан маастар-кылаастары ыытар. Маастар үлэлэрин «ykt.ru в дневниках» эмиэ көрүөххэ, үөрэниэххэ сөп.
Надежда ЕГОРОВА, «Саха сирэ» хаһыат, edersaas.ru