“Ити ханнык эрэ кытай киһитин туһунан суруйан аҕай биэрдиҥ. Биһиги аттыбытыгар кэрэҕэ уонна сырдыкка угуйар дьоммут биллибэккэ-көстүбэккэ сылдьаллар. Кинилэри сырдатыаҥ этэ буоллаҕа”, — диэн биир батсаап бөлөҕүттэн Алексей Никифоров диэн киһи анаан суруйда. “Кимнээҕин ыйан кулу”, — диэн төлөпүөннээбиппэр, сэһэргэһээччим: “Бу аттыбар тураллар, кэпсэт”, — диэн баран төлөпүөнүн кимиэхэ эрэ биэрдэ. “Эчи, түргэнин”, — диэн толкуйдуу да иликпинэ:
— Дорообо, Виссарион Балбаахап диэммин. “Триумф” спортивнай кииҥҥэ бильярдистар кулууптарын чилиэнэбин. Манна 11 ыал аҕата, эһээтэ буолан, хас өрөбүл аайы мустан, дьарыктанабыт, — диэн кэпсээн барда.
Елена ПОТОЦКАЯ, “Саха сирэ” хаһыат, www.edersaas.ru
— Сарсыарда 10-тан киэһэ 8 чааска диэри дьарыктанабыт. Саамай эдэрдэрэ, мин 57 саастаахпын. Саамай кырдьаҕаспыт – 74 саастаах. Сылга иккитэ бильярдка күрэхтэһии тэрийэбит. Икки хайысханан куоталаһабыт: улуус уонна куорат таһымыгар. Ааспыт сыл ахсынньытыгар 120 киһилээх күрэхтэһии буолбута. Аны ыам ыйыгар улуустартан ыҥырыахпыт. Кыайыы 70 сылыгар Псков куоракка эһээм, Аҕа дойду Улуу сэриитин кыттыылааҕа Егор Балбахов уҥуоҕар тиийэн, дойдутун буорун уурбутум. Ол сырыым туһунан “Саха сирэ” хаһыакка сырдатан турабын. Эһэм Егор Егорович аатын үйэтитэн, икки сылы быһа кини аатынан бириистээх күрэхтэһиилэри тэрийэбин. Быйыл үһүс төгүлүн ыытыам.
— Чөл олоҕу тутуһар дьон олох арыгы испэккит, табахтаабаккыт дуо?
— Суох. Олох куһаҕан дьаллыкка сыстыбатах дьоммут. Уруккута учуутал, быраас, механизатор, тутааччы идэлээх дьоммут.
— “Күнү быһа саалаҕа сүтэҕин”, — диэн дьонуҥ мөҥүттүбэт дуо?
— Суох. Төттөрүтүн аралдьыйан, сэргэхсийэн кэлэрбин сөбүлүүллэр. Куоракка от-мас, муус тиэйиитэ суох, түөрт истиэнэни манаан тэлэбиисэр көрө сытыахтааҕар олуһун сэргэхсийэбит. Бэлиитикэттэн саҕалаан, төрөөбүт алаастарбытыгар тиийэ кэпсэтэбит, ырытыһабыт. Онон куоракка олорор эр дьон, ыал аҕалара уонна эһээлэрэ иллэҥ кэмнэрин маннык туһалаахтык атааран, сэргэхсийиэхтэрин наада.
Елена ПОТОЦКАЯ, “Саха сирэ” хаһыат, www.edersaas.ru