Билсиһии — көрсүһүү — уоруу

Ааптар: 
Бөлөххө киир:

«Бытархай» уоруулар күн аайы кэриэтэ уонна киһи үөйбэтэх өттүттэн тахсаллар. Ону ааһан, уоруйах ким баҕарар буолуон сөп — билэр да киһиҥ, саҥа билсибит да киһиҥ. Ону полиция оперативниктара арыйбыт уорууларыттан көрүөҕүҥ, бэйэҕэ түмүктэри оҥостуоҕуҥ.

edersaas.ru


Арыгыһыттарга кыра да наада

Анаабыр улууһугар ас маҕаһыыныгар уоруу тахсыбыт. Ол туһунан полицияҕа маҕаһыын дириэктэрэ иһитиннэрбит. Уопсайа 4 тыһ. солк. суумалаах хоромньу тахсыбыт. Бу уорууга уорбаланан, 29 уонна 25 саастаах дьон тутуллубут.

Барыллаан быһаарыынан, бу сордоохтор итирэн баран, түүн маҕаһыын күлүүһүн алдьатан киирбиттэр. Ол киирэн, бородууктаны уонна биир блок табааҕы ылан тахсыбыттар. Ол кэнниттэн дьиэлэригэр тиийэн, салгыы арыгылаабыттар.

Саарбах дьүөгэ

Өлүөхүмэҕэ 46 саастаах дьахтартан суотабай төлөпүөнүн уонна 1500 солк. харчытын уорбуттар. Бу уорууга уорбаланааччыны туппуттар — Үөһээ Бүлүүттэн төрүттээх 43 саастаах дьахтар.

Эмсэҕэлээччи дьахтар ол күн дьиэтигэр дьүөгэтин ыҥырбыт, бииргэ арыгылаабыттар. Ол аһыы олорон, дьүөгэтэ ыскаапка сытар төлөпүөнү уонна харчыны өйдөөн көрбүт. Оччо көстө сыталлары «бырастыы гымматах» — барарыгар, тутан тахсыбыт.

Бэйэтэ умнубут

Дьокуускай куоракка биир кафеҕа уоруу тахсыбыт — дьахтар сакаас оҥорон баран, кумааһынньыгын каасса таһыгар хаалларан кэбиспит. Сүтүгүн дьиэтигэр кэлэн өйдөөн көрөн, биирдэ «бабат» диэбит.

Кафеҕа төннөн кэлбитэ — кумааһынньыга суох, онно оҥос. Онно 5 тыһ. солк. тахса харчы баара үһү.

Бу уорууга уорбаланан, урут сууттана сылдьыбыт 39 саастаах киһи тутуллубут. Уорбаланааччы билиммитинэн, кини уочаракка туран, дьахтар кумааһынньыгын хаалларбытын көрбүт уонна кэнниттэн эккирэтэн төннөрүөн оннугар, бэйэтигэр ылбыт, харчытын туттубут.

Ночооттоох билсиһии

Дьокуускай куоракка 25 саастаах кыыстан төлөпүөнүн уонна баанын каартатын уорбуттар. Уопсайа 12 тыһ. солк. суумалаах хоромньу тахсыбыт.

Уорбаланааччы тутуллубут — Ленскэйтэн төрүттээх 29 саастаах киһи эбит.

Барыллаан быһаарыынан, дьахтар бу киһилиин кафеҕа билсибиттэр. Онтон гостиницаҕа баран, билсиһиилэрин чиҥэтэн, салгыы аһаабыттар-сиэбиттэр. Ол олорон, дьахтар «мөлтөөн», утуйан хаалаахтаабыт.

Саҥа кавалера ону мүлчү тутуо баара дуо, орон аттыгар турар туумбаҕа дьахтар төлөпүөнэ уонна төлөпүөнүн хаатыгар баанын каартата сылдьарын сойботон барбыт. Уонна уорбутун ломбарга туттаран, 4 тыһ. солк. ылбыт, арыгы атыыласпыт. Уорбутун былдьаабыттар.

Сэрэҕэ суоҕуттан

Дьокуускай куорат биир маҕаһыынын атыылааччытыттан төлөпүөнүн уорбуттар. Дьахтар оперативниктарга быһаарбытынан, кини төлөпүөнүн каасса таһыгар пуолкаҕа уурбут уонна атыылааччылары кытта үлэлэһэ турбут.

Уорбаланааччы тутуллубут — ханна да үлэлээбэт 40 саастаах киһи. Төлөпүөн «мээнэ» сытарын өйдөөн көрөн, өр саарыы барбакка, ылан тахсыбыт. Уорбутун былдьаабыттар.

Биэс мөһөөхтөөх күндү саҕынньах

Дьокуускай куорат полициятыгар биир дьахтар 120 тыһ. солк. сыаналаах нуорка саҕынньаҕын уорбуттарын туһунан сайабылыанньа суруйбут. Уорбаланааччыны туппуттар — Ньурбаттан төрүттээх, урут сууттана сылдьыбыт 37 саастаах киһи эбит.

Барыллаан быһаарыынан, дьахтар командировкаҕа барбыт кэмигэр уола табаарыһын дьиэтигэр ыҥырбыт. Дьэ, ол табаарыс дуома ыалдьыттаан баран, дьиэтигэр барарыгар, дьиэлээх хаһаайка нуорка саҕынньаҕын тутан тахсыбыт. Уонна сол күн 500 солк. харчыга батарбыт.

Эмиэ быстах билсиһии содула

Дьокуускай куорат полициятыгар биир киһи эрийэн, кыбартыыратыттан 20 тыһ. солк. сыаналаах «Honor» суотабай төлөпүөнүн уорбуттарын туһунан иһитиннэрбит. Оперативниктар уорууга уорбаланааччыны туппуттар — 28 саастаах дьахтар эбит.

Барыллаан быһаарыынан, бу киһи доҕорун кытта интэриниэтинэн кыргыттары кытта билсибиттэр. Суруйса түһэн баран, кыргыттары ыалдьыттата ыҥырбыттар. Бииргэ аһаан-сиэн, арыгы иһэн баран, уолаттар утуйан хаалбыттар. Онтон кыргыттартан биирдэстэрэ тахсаары туран, дьиэлээх уол төлөпүөнүн уктан тахсыбыт.

Кыыс оперитивниктарга быһаарбытынан, бэйэтэ туттаары уорбут. Уоруллубут төлөпүөнү былдьаабыттар.

Дьон көспүтүн билэн

Бүлүү куоракка уоруу тахсыбыт — дьон көспүт дьиэтигэр кимнээх эрэ түүн ыйанан турар күлүүһү алдьатан, биир кыбартыыраттан үс вентиляторы, модемы уонна колонкалары сойбоппуттар.

Бу уорууга уорбаланан, Булунтан төрүттээх 21 саастаах уонна Бүлүүттэн төрүттээх 18 саастаах уолаттар тутуллубуттар.

Бу чахчыларынан барытынан «уоруу» ыстатыйанан холуобунай дьыалалар тэриллибиттэрин СӨ ИДьМ-тын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: интэриниэттэн

+1
0
+1
0
+1
0
+1
0
+1
0
+1
0
+1
0