Соторутааҕыта Хайахсыт нэһилиэгин Иннокентий Тимофеев-Теплоухов аатынан “Алаһа” сынньалаҥ киинигэр биир дойдулаахпыт, ССРС доруобуйатын харыстабылын туйгуна, өрөспүүбүлүкэтээҕи травматология уонна термическэй эчэйии отделениетын сэбиэдиссэйинэн үрдүк таһаарыылаахтык үлэлээбит биллиилээх хирург, травматолог-быраас Василий Васильевич Божедонов төрөөбүтэ 80 сылыгар аналлаах дьоро киэһэ буолан ааста.
edersaas.ru
Хаандыгаттан кыыһа Александра Васильевна Морохоева, бииргэ төрөөбүттэрэ Мотрена Васильевна Андреева, Аркадий Васильевич Божедонов уолунаан Василийдыын, кийиит Мария Петровна Божедонова, эһээлэрин ииппит дьонуттан Василий Романович Иванов Дириҥтэн, таай аймахтара Чурапчыттан Анастасия Петровна, Михаил Петрович Филипповтар кэлбиттэр. Василий Васильевич кэргэнэ Анастасия Николаевна итиэннэ быраата Петр Васильевич Божедонов, бу күннэргэ ыарытыйан балыыһаҕа сытар буолан, кыттыыны ылбатылар. Биллиилээх хирург биир идэлээхтэрэ, бииргэ үөрэммит, үөрэппит, уһуйбут быраастара — СӨ үтүөлээх бырааһа, м.н.к., Өрөспүүбүлүкэтээҕи 2№-дээх балыыһа травматологическай-ортопедическай салаатын сэбиэдиссэйэ Анатолий Комиссаров, травматолог-быраастар Виктор Веревкин, Иннокентий Дьячковскай, комбустиолог-быраас Семен Алексеев, о.д.а. куораттан кэлэн, итиэннэ аймах-билэ дьонноро мустан, истиҥ — иһирэх ахтыы киэһэтэ ыытылынна.
Нэһилиэк дьаһалтатын баһылыга Тарас Тарасов күндү ыалдьыттары эҕэрдэлээтэ. Быраастар Анатолий Комиссаров, Виктор Веревкин, оскуолаҕа үөрэппит учуутала, 90 саастаах Екатерина Семеновна Лукина, Улуус Мунньаҕын Бэрэссэдээтэлэ Афанасий Захаров, Хайахсыт куратора, 9 саастааҕар уокка оҕустаран, В.В.Божедоновка эмтэнэн, уустук эпэрээссийэни ааспыт Иннокентий Матвеев, улуус кылаабынай бырааһа Артем Ксенофонтов, Василий Васильевич улахан кыыһа Александра Морохоева уо.д.а. мустубут дьон болҕомтолорун тардар гына иһирэх ахтыылары оҥордулар. Улуустааҕы киин балыыһа кылаабынай бырааһын солбуйааччы Александра Седалищева, Дириҥтэн Валерий Корякин кэрэ ырыалара, Игнат Каженкин, Мария Божедонова тойуктара дьоро киэһэни киэргэтэн, тупсаран, ситэрэн-хоторон биэрдилэр.
Биллиилээх быраастар кэлбиттэринэн, тыа сирин дьоно, күнүс, тоҕоостоох бириэмэ көстүбүтүгэр, доруобуйаларын бэрэбиэркэлэннилэр. Ол курдук, эмчиттэр Хайахсыттан эрэ буолбакка, ыаллыы Хадаар, Чакыр нэһилиэктэриттэн эмиэ кэлбит 40-ча киһиэхэ консультация биэрдилэр.
Нөҥүө күнүгэр чаҕылхай күннээх сарсыарда, В.В.Божедоновка анаммыт өйдөбүнньүк стелланы аһыыга дьон-сэргэ, оҕо-аймах тоҕуоруһа түмүстэ. Тыыннаах сибэкки дьөрбөтүн кыыһа Александра Васильевна, бииргэ төрөөбүттэрэ уурдулар.
Миитини “Алаһа” Норуот айымньытын дьиэтин уус-уран салайааччыта И.Б.Каженкин иилээн-саҕалаан ыытта. Стелланы аһыыга нэһилиэк баһылыга, СӨ култууратын үтүөлээх үлэһитэ Тарас Лукич Тарасов-Тускул, Дьокуускайтан, улуус кииниттэн кэлбит Василий Васильевич биир идэлээхтэрэ — быраастар уонна кыыһа Александра Морохоева тыл эттилэр.
Ол күн ыалдьыттарга анаан Кыра Ньында алааска муҥхалааһын тэрээһиннээхтик ыытылынна.
Үтүө киһи, өрөспүүбүлүкэ талааннаах хирура, киэҥ билиилээх-көрүүлээх травматолог-быраас Василий Васильевич Божедонов үтүө аата-суола биир дойдулаахтарын киэн туттуубутунан буолар. Онон, быйылгы бэлиэ сылга, Туора Күөл хабыллар хаба ортотугар, киниэхэ аналлаах, үйэлэргэ өлбөөдүйбэт өйдөбүнньүк-стелла туруоруллан, дьон-сэргэ улаханнык астынна.
Мария Герасимова-Сэҥээрэ,
Чурапчы улууһа