Муус устар 2 күнүгэр, Оҕо кинигэтин аан дойдутааҕы күнүгэр «Айар» Национальнай кинигэ кыһатыгар оҕо кинигэтин атыылаһарга ааҕааччыларга, ол иһигэр, оскуолаларга, дьыссааттарга, тоҕоостоох кэм тосхойдо.
edersaas.ru
Бүгүн эрэ “Айар” бары маҕаһыыннарыгар оҕолоох кэлбит атыылаһааччыларга бэлэх оҥоһуллар. 2 кинигэттэн элбэҕи атыыластахха — 10%, 5 кинигэттэн элбэҕи атыыластахха – 20%, 7 кинигэттэн элбэҕи атыыластахха 30% чэпчэтии оҥоһуллар.
Оҕолорго аналлаах кинигэлэри Кыһа исписэлииһэ Анисия Неустроева билиһиннэрдэ:
«Откуда берется еда»
Ыраахтан дыргыйар сыттаах килиэп, мүөт, хойуу сүөгэй хантан кэлэрий? Бу туһунан билиэххин баҕараҕын? Оччоҕо бу кинигэни ылан ааҕа охсорго тиэтэй. Ону таһынан кинигэ сирэйдэригэр сымсатык саспыт Тема куосканы булуоххут.
«Легенды и сказки Севера»
Кинигэҕэ Арассыыйа Хотугу сирин норуоттарын: сахалар, эбээннэр, эбэҥкилэр, дьүкээгирдэр, долганнар, чукчалар, эскимостар уо.д.а. номохторо уонна остуоруйалара киирдилэр. Кинигэни ааҕа олорон ыраах сытар уонна дьикти кистэлэҥнээх Хотугу сиргэ тиийэн хаалаҕын, хотугу кыраай тыйыс уонна киһини абылыыр кэрэтин билэҕин.
«Ааҕар дьоҕургун сайыннар»
Бу таһаарыы кырачаан киһини суругу-бичиги судургутук ылынан, өйдөөн, түргэнник ааҕарга үөрэтиэҕэ. Хас биирдии сирэй дьэрэкээн ойуута оҕо болҕомтотун тардар, интэриэһин көбүтэр күүстээх. 32 карточка дорҕоон/буукуба, сүһүөх, тыл, этии түһүмэхтэргэ арахсар. Сорудахтары фломастерынан эбэтэр маркерынан толоруллар. Эппиэти төһө баҕарар сотон көннөрүөххэ сөп.
Төрөппүт, учуутал оҕону кытта дьарыктанарыгар туһуланар.
«Ахсаан=Счет»
Кырачаан киһи маҥнайгы тылларын саҥарарыгар, кэпсэтэ, тулалыыр эйгэни билэ-көрө үөрэнэригэр ойуу кинигэлэр көмө буолуохтара. Кинигэлэр кытаанах хортуонтан оҥоһуулаахтар, тутарга-хабарга табыгастаах көрүҥнээхтэр. Кинигэлэри туһанан, оҕо икки тылы тэҥинэн баһылыа, толкуйдуур дьоҕура тэтимнээхтик сайдыа.
«Тэбэр Тиэхэ бэтиэхэлэрэ»
Былыр-былыргыттан өбүгэлэрбит остуоруйа кэпсээн, оҕолорун үчүгэйи-куһаҕаны араарарга, толкуйдуурга үөрэтэллэрэ, олоххо бэлэмнииллэрэ.
Бу остуоруйа киһи майгытын күлүк өттүн көрдөрөр. Ол курдук, биһирэмнээх дьоруой суох. Оҕо олоххо көстөр араас быһыыны-майгыны, дьон үчүгэй да, омсолоох да өрүтүн арааран өйдүү үөрэниэ.
Надежда ЕГОРОВА, «Саха сирэ», edersaas.ru