Бэҕэһээ, сэтинньи 13 күнүгэр, Саха сирин бастакы бэрэсидьиэнин Михаил Николаев төрөөбүт күнүгэр «Билиигинэн кыайыаҥ» стипендияны сүүрбэһис төгүлүн туттардылар. Быйыл стипендияны биэс киһи ылла.
«Бүгүн стипендияны ылбыт олоххо идэлэригэр сөпкө тайанан, үлэлии-хамсыы сылдьар дьон ыллылар», — диэн Михаил Ефимович бэлиэтээн эттэ.
Стипендиаттарга Ил Дархан Айсен Николаев эҕэрдэтин тиэрдэн туран, «Билиигинэн кыайыаҥ» стипендия Арассыыйаҕа талааннаах оҕолору өйүүргэ, учууталлар, педагогтар үлэлэрин үрдүк таһымҥа сыаналыырга биир бастыҥ наҕараада буоларын эттэ.
Стипендия уопасастыбаннай хамыыһыйатын бэрэссэдээтэлэ Афанасий Ноев иһитиннэрбитинэн, быйыл уопсайа 51 сайаапка киирбит: 33 үөрэнээччиттэн, 18 үөрэхтээһин үлэһититтэн. Урукку сыллары кытта аахтахха, стипендияны 66 педагог уонна 48 үөрэнээччи ылбыта биллэр.
Быйыл бириэмийэни ыллылар:
— Сунтаар политехническэй лиссиэй-интэринээтин 11-с кылааһын үөрэнээччитэ Виталий Кырелов;
— А.С.Шахурдин аатынан Төҥүлү оскуолатын 10 кылааһын үөрэнээччитэ Валерия Матросова;
— А. уонна Н. Посельскаялар ааттарынан Дьокуускайдааҕы балет оскуолатын 2-с кууруһун устудьуона Алисия Пак;
— Өктөмнөөҕү научнай-үөрэтэр киин научнай-методическай үлэҕэ дириэктэри солбуйааччы Марина Алексеева;
— В.А.Босиков аатынан Муусука үрдүкү оскуолатын концертмейстерэ Игорь Захаров.