Арассыыйатааҕы “Билии” уопсастыба балаҕан ыйын 1-9 күннэригэр РФ Үөрэҕириигэ, РФ Билимҥэ уонна үрдүк үөрэххэ министиэристибэлэрин өйөбүллэринэн күһүҥҥү марафон иитинэн “Билиигин үллэһин” диэн сырдатар аахсыйаны ыытар.
Аахсыйанан дойду тыһыынчанан үөрэнээччитин, устудьуонун хабыахтара. Биллэр-көстөр судаарыстыбаннай уонна уопсастыбаннай диэйэтэллэр, уһулуччулаах учуонайдар, билими тарҕатааччылар, биисинэс лиидэрдэрэ, култуура уонна ускуустуба эйгэтин бэрэстэбиитэллэрэ, о.д.а. ситиһиилээх настаабынньыктар эдэр көлүөнэни кытта билиилэрин үллэстиэхтэрэ.
Тэрийээччилэр бэлиэтииллэринэн, балаҕан ыйынааҕы аахсыйа номнуо үһүс төгүлүн ыытыллар эбит. Икки бастакы көҕүлээһин иитинэн 10 тыһ. тахса сырдатар тэрээһиннэр буолбуттар. Былырыын саҕаланыытыгар бастакы истээччилэр сүрүннээн оскуола оҕолоро эбит. Быйыл устудьуоннар хото кыттыахтара диэн этэллэр.
Арассыыйатааҕы “Билии” уопсастыба генеральнай дириэктэрэ Максим Древаль:“Билиигин үллэһин” диэн аахсыйа көлүөнэлэр икки ардыларынааҕы кэпсэтии, санааны үллэстии уонна уопут атастаһыыта буолар. “Оскуола үөрэнээччилэрэ, устудьуоннар дойду ситиһиилээх дьонун кытта сэһэргэһэн билиилэрэ-көрүүлэрэ кэҥиэҕэ, бэйэлэригэр эрэллэрэ күүһүрүөҕэ. Маннык судургу, аһаҕас кэпсэтии хас биирдии аахсыйа кыттааччытыгар да, уопсайынан, дойдуга даҕаны суолталаах, кэскилбитин бары түмсэн оҥоробут”, — диэн быһаарар.
“Билиигин үллэһин” аахсыйа атырдьах ыйын 31 балаҕан ыйын 2 күннэригэр ыытыллар “Билии” федеральнай сырдатар марафон иитинэн барыаҕа. Оскуолаларга, кэллиэстэргэ, үрдүк үөрэх кыһаларыгар, бибилэтиэкэлэргэ, култуура дьиэлэригэр, түмэллэргэ, о.д.а. тэрилтэлэргэ араас сырдатар уруоктар, лиэксийэлэр, экскурсиялар, көрсүһүүлэр, маастар-кылаастар, дьыалабыай оонньуулар, оонньуур бырагыраамалар, литэрэтиирэ көстүүнэйдэрин быһыытынан ааһыахтара.
“Саха сирэ” хаһыат, edersaas.ru