“Төрөөбүт төрүт дойдум – Уус Алдан” диэн ааттаах билиини-көрүүнү тургутар бэртээхэй күрэс Уус Алдан улууһугар аан бастаан буолла. Бу кэнчээри ыччат төрөөбүт дойдутун устуоруйатын, олоҕун-дьаһаҕын дириҥник билэригэр-көрөрүгэр ананан ыытыллар. Куонкуруһу улуус дьаһалтата, үөрэх управлениета уонна оҕо бибилэтиэкэтэ тэрийбиттэр. Сиһилии улуустааҕы оҕо бибилэтиэкэтин бибилэтиэкэрэ Надежда Гоголеваттан ыйыталастыбыт.
—Билиини-көрүүнү тургутар күөн күрэс улууспут оскуолаларын орто сүһүөх кылааһын үөрэнээччилэригэр ананна, Өрөспүүбүлүкэ күнүн көрсө ыытылынна. Тута этэбин, бу тэрээһиммитин оҕолор, учууталлар, төрөппүттэр наһаа биһирээтилэр. Күөн күрэс икки түһүмэҕинэн барда. Бастакы түһүмэххэ оскуолалар кэтэхтэн кыттан 15 ыйытыыга хоруйдаабыттара. Ол түмүгүнэн, тургутууну ааспыт хамаандалары Бороҕоҥҥо түмтүбүт. Иккис түһүмэххэ, аан бастаан хамаандалар бэйэлэрин билиһиннэрдилэр. Ол кэнниттэн “Төрөөбүт төрүт дойдум – Уус Алдан” оонньууга нэһилиэктэрин, улуустарын олоҕун-дьаһаҕын, устуоруйатын сырдаттылар. Салгыы “Төрөөбүт дойдум ытык кэрэ сирдэрэ” диэн үһүс туурга медиа-презентационнай үлэлэрин көмүскээтилэр. Манна оҕолор ытык сирдэрин, пааматынньыктары, анал тутуулары көрдөрөн кэпсээтилэр, ыйытыыларга хоруйдаатылар, инники былааннарын билиһиннэрдилэр.
Улуустааҕы үөрэх управлениетын начаалынньыга Ирина Михайловна Тарская бэрэссэдээтэллээх дьүүллүүр сүбэ хамаандалар үлэлэрин ымпыгар-чымпыгар тиийэ болҕойон көрбүт, сыаналаабыт. Үөрэнээччилэр ох курдук оҥостон, бэлэмнэнэн кэлбит буоланнар, эриһии кытаанаҕа буолбут. Түмүккэ, 1 миэстэни Суотту орто оскуолатын “Суоттукаана” хамаандата ылан үөрбүттэр-көппүттэр. 2-с бириистээх миэстэҕэ Найахы үөрэнээччилэрин “Найахы эрэллэрэ” хамаандата, үһүскэ Орто Эбэ сүрүн орто оскуолатын “Эрэл” хамаандата тахсан дьоннорун-сэргэлэрин эҕэрдэлэрин туппуттар.
Надежда Васильевна, маны сэргэ, “Бэйэни билиһиннэрии бастыҥа” анал ааты “Кыһыл кырдал кэскиллэрэ” диэн Хоноҕор сүрүн оскуолатын хамаандатыгар, “Бастыҥ маршрут” анал ааты “Майаҕатта удьуордара” диэн Сыырдаах орто оскуолатын үөрэнээччилэрин хамаандатыгар туттарбыттарын, Орто Эбэ сүрүн оскуолатын 7-с кылааһын үөрэнээччитэ Семен Рожин саамай элбэх ыйытыыга сөптөөх хоруйу биэрбитэ бэлиэтэммитин кэпсээтэ.
Бары кыайыылаахтарга мэтээллэр, сертификаттар, бириистэр туттарыллыбыттар. Көһө сылдьар кубогы кыайыылаах Суотту орто оскуолатын хамаандата ылбыт.
Сардаана БАСНАЕВА, “Саха сирэ” хаһыат, edersaas.ru