Билии күнүгэр ноутбуктары бэлэхтээтилэр

Бөлөххө киир:

Тойбохойдооҕу Оҕо дьиэтин иитиллээччилэригэр ноутбуктары, оҕо оонньуурдарын, өйү сайыннарар оонньуурдары уонна биирдэ кэтиллэр мэдиссиинискэй мааскалары атыылаһарга сэртипикээти Саха Өрөспүүбүлүкэтин Үүнэр көлүөнэ тус сыаллаах пуондатын генеральнай дириэктэрэ Владимир Егоров туттарда. Олох уустук балаһыанньатыгар түбэспит оҕолору өйүүргэ тус сыаллаах пуонда, АЛРОСА үбүн суотугар олоххо киллэрэр «Инники кэскил иһин» тус сыаллаах бырагыраама «Сайдыы» хос бырагырааматын чэрчитинэн дьоһун суолталаах үлэтэ буоларын бэлиэтээтэ.

edersaas.ru

«Үтүө үгэс быһыытынан, Билии күнүн сырдык бырааһынньыгар олох ыарахан балаһыанньатыгар түбэспит оҕолорго биһиги сыл аайы оскуолаҕа үөрэнэр нобуордары биэрэбит. Быйыл, көмпүүтэр тиэхиньикэтигэр наадыйыы баарын учуоттаан, толору үөрэх хаамыытыгар улахан көмөлөөх ноутбуктары бэлэхтииргэ быһаарынныбыт. Эһиги Саха сирэ ыраахтан үөрэххэ хаачыстыбалаахтык көһүүгэ инники иһээччилэртэн биирдэстэринэн буолан, үөрэх дьылын ситиһиилээхтик түмүктээбитин билэҕит. Барыта күүстээх дьаныарынан, өрөспүүбүлүкэ салалтатын өйөбүлүнэн, Саха сирин уопсастыбаннаһын, учууталлар уопсастыбаларын, төрөппүттэр, биисинэс, улахан хампаанньалар бииргэ түмсүүлэринэн ситиһилиннэ. Биһиги быйыл эмиэ хаачыстыбалаах үөрэххэ тиийэр суолбутугар мэһэйдэри бииргэ туоруохпутугар эрэнэбин”, – диэтэ Владимир Егоров.

Билигин Тойбохойдооҕу Оҕо дьиэтигэр 20 оҕо иитиллэр. Социальнай тэрилтэ саҥа үөрэх дьылын тустаах ситиһиилэрдээх көрсөр. 7-с кылаас үөрэнээччитэ Зафар Решетников көҥүл тустууга Уһук Илиҥҥи аһаҕас чемпионакка 4-с миэстэни ылла, Оҕо дьиэтин 8 иитиллээччитэ “Инникигэ эрэллээх” профориентационнай бырайыакка кытынна уонна Анапа куоракка барарга путевка ылла. Улахан ситиһиилэртэн биирдэстэрэ – кэнники сылга үс оҕо тута төрөппүт дьиэлэннэ.

Санатан эттэххэ, бу күннэргэ Үүнэр көлүөнэ тус сыаллаах пуондата уонна АЛРОСА, “Дьиэҕэ үөрэнэргэ көмөлөс” Бүтүн Арассыыйатааҕы аахсыйа чэрчитинэн, Дьокуускай куорат уонна өрөспүүбүлүкэ кэккэ улуустарын дьиэ кэргэттэригэр планшеттары бэлэхтээтилэр. СӨ Үөрэххэ уонна наукаҕа министиэристибэтин “Саха сирин эдэр олохтоохторо” өрөспүүбүлүкэтээҕи ресурснай киинин дириэктэрэ Варвара Васильеваҕа электроннай планшеттар туттарылыннылар. Аахсыйаны “Биир ньыгыл Арассыыйа” Бүтүн Арассыыйатааҕы бэлитиичэскэй баартыйа стратегическай көҕүлээһиннэргэ агенствота көҕүлээтэ.

“Бу аахсыйа Саха сиригэр быйыл кулун тутартан саҕаламмыта уонна Саха сирин олохтоохторо, ол иһигэр, муниципальнай оройуоннар, уопсастыбаннай диэйэтэллэр, үөрэх управлениелара, биисинэс бэрэстэбиитэллэрэ уонна нэһилиэнньэ, хара маҥнайгыттан биһиги ыҥырыыбытыгар көхтөөхтүк кыттыһан барбыттара. Бу ыраахтан үөрэниигэ балачча ыксаллаах болдьоххо маассабай көһүү усулуобуйатыгар улахан өйөбүлүнэн уонна тирэҕинэн буолбута. Аахсыйа инникитин даҕаны үөрэнээччилэр үөрэх бырагырааматын хаачыстыбалаахтык баһылыылларыгар көмөлөһүөҕэр эрэнэбин. Үүнэр көлүөнэ пуондата уонна АЛРОСА “2016-2020 сылларга инники кэскил иһин” тус сыаллаах бырагыраама “Сайдыы” хос бырагырааматын чэрчитинэн, дьиэ кэргэттэри, оҕолору уонна ыччаты өйөөһүҥҥэ тус сыаллаах үлэни ыытар”, – диэн СӨ Үүнэр көлүөнэ тус сыаллаах пуондатын генеральнай дириэктэрэ Владимир Егоров планшеттары туттарыы үөрүүлээх сиэригэр-туомугар бэлиэтээн эттэ.

“”АЛРОСА” уоннна Үүнэр көлүөнэ пуондата эпидемиология уустук балаһыанньатын кэмигэр уонна инникитин даҕаны Саха сирин оскуолаларыгар ыраахтан үөрэниигэ көһөр оҕолордоох дьиэ кэргэттэргэ уонна үөрэнээччилэргэ көмөлөһүөхтэрэ. Сотору кэминэн биһиги бииргэ үлэлэһэр СӨ Үүнэр көлүөнэ тус сыаллаах пуондатын кытары Сунтаар улууһун Тойбохойдооҕу Оҕо дьиэтигэр ыраахтан үөрэнэргэ аналлаах тиэхиньикэлэри Оҕо дьиэтин иитиллээччилэригэр уонна олох уустук балаһыанньатыгар түбэспит дьиэ кэргэттэргэ биэриэхпит. АЛРОСА хаачыстыбалаах ыраахтан үөрэнии дьарыктара уонна үөрэхтэрэ, дьиэ кэргэн дохуотуттан тутулуга суох, Саха сирин хас биирдии үөрэнээччитигэр табыгастаах буоларын туһугар Бүтүн Арассыыйатааҕы аахсыйаҕа кыттар”, – диэтэ “АЛРОСА” Саха сиринээҕи отделын начаалынньыга Ладимир Аргунов.

“Саха сирин эдэр олохтоохторо” өрөспүүбүлүкэтээҕи ресурснай киин дириэктэрэ Варвара Васильева бэлиэтээбитин курдук, билигин Саха сирин 3 тыһыынчаттан тахса үөрэнээччитэ көмпүүтэр тиэхиньикэтинэн хааччылынна. Кини үөрэнээччилэр ааттарыттан Үүнэр көлүөнэ тус сыаллаах пуондатыгар уонна АЛРОСА-ҕа биллэр көмөлөрүн иһин махтанна. Кинилэр тиһигин быспакка оҥорор көмөлөрө Саха сиригэр оҕолору иитиигэ уонна эбии үөрэхтээһини сайыннарыыга биллэр түмүктэри аҕаларын бэлиэтээтэ.

Бу күннэргэ көмпүүтэр тиэхиньикэлэрэ ону сэргэ Кэмпэндээйи сэлиэнньэтин бастакы кылааска киирэр үөрэнээччилэригэр уонна элбэх оҕолоох дьиэ кэргэттэргэ бэриллиэхтэрэ. Манна Үүнэр көлүөнэ пуондата 2022 сылга “Сир уустара” өрөспүүбүлүкэтээҕи үөрэтэр-чэбдигирдэр киин утуйар куорпуһун тутарга былаанныыр.

«Саха сирэ», edersaas.ru cайтка анаан “АЛРОСА” АХ уонна СӨ Үүнэр көлүөнэ тус сыаллаах пуондатын пресс-сулууспалара.

+1
0
+1
0
+1
0
+1
0
+1
0
+1
0
+1
0