“Билигин өрөспүүбүлүкэ үрдүнэн 2012 с. тохсунньу 1 күнүгэр диэри испииһэккэ киирбэккэ хаалбыт икки тыһыынчаттан тахса хаарбах дьиэҕэ 44 тыһ. тахса киһи олорор”, — диэн иһитиннэрдэ олохтоох салайыныы сэбиэтин мунньаҕар Тутуу миниистирэ Вера Кузакова.
Кини бэлиэтииринэн, 2010 с. биэс сыл устата өрөспүүбүлүкэҕэ барыта 2,4 мөл. кв м тутуллубут, ол иһигэр 1,1 мөл. кв м тус олорор дьиэ ылар. Бу кэм иһигэр 16 тыһ. тахса ыал олорор дьиэтин тупсарбыт. Санатан эттэххэ, быйыл, былаан быһыытынан, 600 тыһ. кв м дьиэ тутуллуохтааҕа. Ити былырыыҥҥы сылы кытары тэҥнээтэххэ, 15 % үрдүк.
Хаарбах дьиэттэн дьону көһөрүү бырагырааматынан 2017 с. балаҕан ыйыгар диэри 490 тыһ. кв м дьиэ көһөрүллүөхтээх. Билигин итинтэн 240 тыһ. кв м көһөрүллүбүт. Барыта 15 тыһ. тахса киһи дьиэтин тупсарбыт. Бу сылга өссө 125 тыһ. кв м дьиэ тутуллуохтаах. Билиҥҥи туругунан, мантан 34 тыһ. кв м тутуллубут. Сыл түмүгүнэн өссө 69 тыһ. кв м дьиэ үлэҕэ киириэхтээх. Хаалбыт иэни эһиил ситэрэн биэрэр былааннаахтар.
Хаарбах дьиэлэри көһөрүүгэ барытыгар 30 млрд солк. көрүллүөхтээх. Билиҥҥи туругунан, өрөспүүбүлүкэ итинтэн 18 млрд солк. туһанан олорор. Былааннарын билигин Томпо, Хаҥалас, Таатта, Чурапчы, Сунтаар улуустара толорон иһэллэр.
Манна даҕатан эттэххэ, бу федеральнай бырагыраама эһиил балаҕан ыйыгар түмүктэниэхтээх. Ол эрээри Ил Дархан атын регионнары кытары кыттыһан федерация салалтатыгар бырагырааманы уһатарга диэн этии киллэрбитэ. Уонна федеральнай бырагыраама салгыы үлэлиириттэн-үлэлээбэтиттэн тутулуга суох өрөспүүбүлүкэҕэ хаарбах дьиэлэри көтүрүү салҕаныаҕын туһунан эппитэ.
Тутуу миниистирэ хаарбах дьиэлэри суох оҥорууну таһынан, “Мин Сахам сирэ – XXI үйэҕэ” үтүө дьыала хамсааһынынан сиэттэрэн, тутуу хаачыстыбатыгар болҕомтону уурда. Билэргит курдук, бу соторутааҕыта Абыйга саҥа тутуллубут спортивнай саала сууллан улахан хоромньуга тэптэ.
Аграфена КУЗЬМИНА.