Ыам ыйын 15 күнүнээҕи туругунан, өрөспүүбүлүкэ ойуурун фондатын сиригэр уот туруута бэлиэтэнэ илик. Былырыын бу күҥҥэ 1543 гектар ойууру хабан 24 уот көрдүгэннээбитэ.
Таҥара көмөтүнэн дуу эбэтэр айылҕабыт аһынан дуу, баччаҕа диэри ханна даҕаны уот көрдүгэннии илик. Уот турдаҕына, уу иэдээнин кытта охсуһа сылдьар дьон букатын иэдэйэр буоллахтара. Ол, дьиҥ иһигэр, халлаан улаханнык куйаара илигиттэн, сөрүүн, сииктээх күннэр туралларыттан төрүөттээҕэ биллэр. Төттөрүтүн, халлаан сөрүүнүттэн уонна ситэри сэниэлээхтик ардаабатыттан сиэттэрэн, муус кыайан кэбирээбэккэ, өрүстэргэ халыҥ халҕаһалар аҥаардастыы айбардаатылар. Онон туох барыта икки өрүттээх.
Саха Өрөспүүбүлүкэтин ойуурун хаһаайыстыбатын регионнааҕы диспетчерскэй сулууспата Рослесхоз-ИСДМ дистанционнай тиһигин көмөтүнэн күн аайы ойуурга уот туруутун кэтээн көрөр. Итиэннэ Ойуур сыһыаннаһыыларыгар департамент киһи буруйунан хонтуруола суох өртөөһүнү уонна уот туруутун таһаарбат туһуттан ойуурга уоттан сэрэхтээх буолуу быраабылаларын кэһиини туоратыыга уонна буруйдаахтары булууга оперативнай бөлөхтөрү тэрийдэ. Бары лесничестволарга былаан-графикка сөп түбэһиннэрэн, рейдэлэр ыытыллаллар, сааскы кустааһын иннинэ уонна кэмигэр айылҕа харыстабылын иниспиэктэрдэринээн, ЫБММ, ИДьМ уонна олохтоох салайыныы үлэһиттэринээн кыттыһан, хонтуруол күүһүрдүллүө.
Департамент өрөспүүбүлүкэ олохтоохторугар уонна ыалдьыттарыгар ойуурга уоттан сэрэхтээх буолуу ирдэбилин кыраҕытык тутуһуохтааххытын санатар. Өскөтүн, эһиги ойуурга уот көрдүгэннээн эрэрин көрдөххүтүнэ, регионнааҕы диспетчерскэй сулууспаҕа 8-4112-44-74-76 эбэтэр ойуур харыстабылыгар быһа 8-800-100-94-00 төлөпүөннэргэ эрийэн биллэриҥ.
Василий НИКИФОРОВ, «Саха сирэ» хаһыат, edersaas.ru