Бикиҥҥэ Саха сириттэн элбэх саллаат сулууспалаан ааспыт 57–с мотострелковай биригээдэтэ баар. Онуоха, араас батальонҥа — танковайга, артиллерияҕа, мотострелковайга, разведкаҕа уо.д.а. армейскай олоҕу, олох оскуолатын ааспыттара. Саллааттарга сулууспалыырга уонна байыаннай дьарыкка уһаарылларга сөптөөх усулуобуйа баар. Бикинҥа төһө да сайынын куйаас уонна сииктээх салгыннааҕын, кыһынын тымныы, сииктээх тыаллааҕын иһин, сыыйа-баайы айылҕатыгар, сиригэр-уотугар, күнүгэр-дьылыгар саллааттар үөрэнэллэр. edersaas.ru
Ыам ыйын 30 күнүгэр Бикинҥэ Саллааттар уонна мотуруостар төрөппүттэрин Кэмитиэтин салайааччыта Мария Емельянова сэргэх тэрээһин ыытта. Өбүгэлэр илдьэ кэлбит үгэстэрин тутуһан Уйгу Семенов, алгысчыт аал уот оттон, сахалыы сиэри-туому толордо. Саллааттар алгыс ылынан, Омоҕой оҕонньор саҕаттан олохтоммут оонньууга бары бииргэ түмсэн – оһуокайдаатылар, хапсаҕайга күрэстэһэн ханыыластылар уонна мас тардыһан хачыгыратан күүс-уох өттүнэн эбиннилэр. Маны таһынан, ыһыах бастыҥ аһын кымыһы иһэн, мип-минньигэс саһарчы буспут алаадьы амсайан олус астыннылар, дуоһуйдулар. Бикин саллааттара күндү ыалдьыттарга, Мария Егоровнаҕа, ийэлэргэ үөрүүлэрин эттилэр, сиэри-туому ыыппыт алгысчыкка, культура колледжын устудьуонугар Уйгу Семеновка барҕа махталларын биллэрдилэр уонна дьонноругар, доҕотторугар уруйдаан-айхаллаан эҕэрдэ тириэртилэр.
Манна даҕатан эттэххэ, Саха сириттэн саллааттар Бикиҥҥэ сүрдээх түмсүүлээхтэр, биир дойдулаахтарын кытта өйөһөн-өйдөһөн этэҥҥэ сулууспалара баран иһэр. Саҥа кэлбит саллааттарга бэриллэн иһэр армияҕа түмсүүлээх буолуу үгэһэ.
