Бэйэ дьыалатын тэрийиини, биисинэһинэн дьарыктаныыны оҕо эрдэхтэн.
«Мин биисинэһим» киин сайыҥҥы кэмҥэ 14-гэр диэри саастаах оҕолорго анаан «Genesis 2022» лааҕыры үлэлэтэр. Манна бэйэ дьыалатын саҕалыырга уонна сайыннарарга анаан оҕолору от ыйын 18-22 күннэригэр үөрэтэллэр.
Биэс күн устатыгар улаатан эрэр оҕолор англия тылын үөрэтэллэр, элбэх киһи ортотугар саҥарарга-иҥэрэргэ такайыллаллар. Ону сэргэ, бэйэлэрин биисинэс-бырайыактарын оҥоруохтара. Маастар-кылаастар, трениннэр былааннаналлар. Ситиһиилээх предпринимателлэри кытары көрсүһүөхтэрэ, билиини тургутар викториналар, араас күрэстэр, оонньуулар ыытыллыахтара.
Биисинэс-лааҕырга ситиһиилээхтик дьарыктаммыттарга сэртипикээттэр туттарыллаллар, бастыҥнар предпринимательствоҕа өрөспүүбүлүкэтээҕи олимпиада түмүгэр путевканы ылыахтара.
Биисинэс-лааҕыр Саха сиригэр оҕолорго 2020 сылтан үлэлиир. «Genesis» бастакы симиэнэтигэр өрөспүүбүлүкэ улуустарыттан 50 үөрэнээччи сылдьыбыта.
Ааспыт симиэнэҕэ сылдьыбыт оҕолор лааҕырга маркетинг, былааны толкуйдааһын, сыананы оҥоруу ньымаларын, биисинэһи хайдах саҕалыыр туһунан, о.д.а элбэх туһалааҕы билбиттэрин бэлиэтииллэр.
«Бу бырайыактан мин өйдөөтүм, хайа баҕарар киһи дьулуурдаах буоллаҕына, кыһалыннаҕына ситиһиилэниэн сөп», — диэн Андрей Васильев (Чурапчы) этэр. Алдантан Денис Васильев бэйэ дьыалатын хайдах сайыннарары, о.д.а. элбэх туһалааҕы билбитин бэлиэтиир.
+1
+1
+1
+1
+1
+1
+1