«БиисинэсЭкспo-2019»: Горнай улууһун отон кэмпиэтинэн ааттатта
Горнай улууһун Маҕарас нэһилиэгин олохтооҕо, урбаанньыт Вера Лиханова «БиисинэсЭкспo-2019» быыстапкаҕа анаан кэлэн кыттан, «Оҥоһук бастыҥ көрүҥэ» номинацияҕа бэлиэтэннэ.
edersaas.ru
Вера отон арааһын куурдан, хатаран пастила-кэмпиэт оҥорор эбит. Киһи какаоны кытта буккуйан бу пастиланан сакалаат да оҥоруон сөп курдук. Пастила минньигэс кэмпиэти солбуйарын ааһан, доруобуйаҕа эмиэ олус туһалааҕа чахчы. Эчи, суута-хаҕа да — киһи амсайыах баҕатын көбүтэр.
Сахабыт дьоно бииртэн биир олохтоох бородууксуйаны дьон сэҥээриитигэр таһааран иһэллэрэ — өрөспүүбүлүкэбит сайдыытын олуга буоллаҕа.
— Биһиги дьиэ кэргэн кыралыын-улаханныын бэйэ дьыалатын тэринэн, сайдыы суолун тутустубут. Ол курдук, сылгы иитиитинэн дьарыктанабыт. Таҥас тигиитин баһылаатыбыт. Отону, эмтээх үүнээйини, оҕуруот аһын куурдан, хатаран пастила, кэмпиэт арааһын оҥоробут.
«БиисинэсЭкспо-2019» быыстапка биһиги курдук бэйэ дьыалатын арынан, сайдыы саҕаҕын баһылаан эрэр дьоҥҥо олус туһалаах. Бэйэбит эт харахпытынан көрөн, билсэн, кэпсэтэн? уопут атастаһан, салгыы үлэлиирбитигэр хас да хардыыны инники түһэбит. Мин куонкукурска кытта сылдьабын дии санаабатаҕым даҕаны. Кэлэн быыстапкаҕа тугу көрдөрө аҕалбыппын испииһэктээбиттэрэ. Онно үлэм көрүҥүн ааҕан туран, тугу көрдөрө аҕалбыппын барытын эппитим. Учуоттуу-ааҕа сылдьаллар дии санаабытым. Онтум улахан куонкуруска кытта сылдьар эбиппин! Онон «Оҥоһук бастыҥ көрүҥэ» номинацияҕа кыайыылааҕынан бэлиэтэниим – дьиэ кэргэним, аймахтарым, миэхэ өрүү өйөбүл буолар чугас доҕотторум – барыбыт өрөгөйдөөх кыайыыбыт буолар. Киһи үлэтин түмүгэ табатык сыаналанарын саҕа күндү суох. Кыайыы көтөллөнөн баран, дьиэбэр кэлэн, үлэбин, тугу оҥоро сылдьарбын, тугу былааннаабыппытын сыта-тура ырытан көрдүм. Киһи кинини тулалыыр дьонноох, ол дьоно түмсүүлээх буолалларыгар сытар эбит – ситиһии төрдө.
Онон Сомоҕолоһуу сылыгар биһиги тула күүстээх сомоҕо баар буолан, араас урбаан салаатыгар биир тэҥник араас хайысханы сайыннара сырыттахпыт, — диэн санаатын үллэһиннэ «БиисинэсЭкспо-2019» быыстапка «Оҥоһук бастыҥ көрүҥэ» номинация кыайыылааҕа.
Горнай улууһун урбаанньыттарын өрөспүүбүлүкэтээҕи суолталаах быыстакаҕа кыттан, фермер Вера Лиханова дорҕоонноохтук ааттатта. Киниэхэ бары саҕалааһыннара табыллан, кэмигэр олоххо киирэн истин диэн, кэлэн иһэр Саҥа дьыллааҕы эҕэрдэбитин тиэрдэбит.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.