Доруобуйа

Биисинэс хамсыктан кыһарыйтарар

Бүгүн, сэтинньи 24 күнүгэр, Саха Өрөспүүбүлүкэтин Уопсастыбаннай палататын “төгүрүк остуолугар” “Уопсастыбаннай миэстэлэргэ GR-куоду киллэрии туһунан” кэпсэттилэр. “Төгүрүк остуол”модераторынан СӨ Уопсастыбаннай палататын чилиэнэ, Дьокуускай куораттааҕы 3 №-дээх балыыһа кылаабынай бырааһа Светлана Давыдова буолла. Тэрээһиҥҥэ Роспотребнадзор Саха сиринээҕи управлениетын салайааччытын солбуйааччы Изабелла Самойлов, СӨ Урбаанньыттарын быраабын көмүскээһиҥҥэ боломуочунайа Альбина Кычкина уо.д.а. кытыннылар.

Кэпсэтиигэ урбаанньыттар боломуочунайдара Альбина Кычкина биисинэс эйгэтэ хамсыктан сылтаан үгүс кыһалҕаны көрсүбүтүн эттэ. Кини бу куары тутуһуу уусту боппуруоһугар тоҕо урбаанньыттар эрэ эппиэтинэһи сүгэллэриттэн муҥатыйда. Холобур, ханнык эрэ поликлиникаҕа эҥин бэрэбиэркэ ыытыллыбытын истэ иликпин диир. Онто да суох нолуоктар, араас төлөбүрдэр ороскоуттара урбаанньыттары кыһарыйар. Биисинэс дьоно эмиэ дьиэлээх-уоттаах, үлэһиттэрдээх дьон диир. Бу хамсык кэмигэр хонтуруолааччылар наһаа элбээбиттэрин бэлиэтээтэ. Уопсастыбанньыктар, суруналыыстар эмиэ бэрэбиэркэлииллэр диир. Ити түмүгэр биисинэс уонна гражданин диэн утарсыы баар диир.

Модератор Светлана Давыдова эмчит буоларынан, биир дьаҥнаабыт киһи хас киһини сутуйуон сөбүн ахсаанынна холобурдаата. “Өскөтүн эһиги быһыыны ылбыт буоллаххытына, дьаҥ тарҕаныытын тохтотууга көмлөһөҕүт. Мааскалаах, куардаах сылдьарга үөрэниҥ, дьиҥэ, бу быстах кэмнээх дьаһаныы”, — диэн ыарыы хаптайарыгар эрэнэрин биллэрдэ.

Изабелла Юрьевна мөккөүрдээх боппуруостарга Росздравнадзога сайабылыанньата түһэжриҥ диэн сүбэлиир. “Коронавирус диэн дьаҥ аан дойду суолталаах буолла. Ыалдьыбыттар 60 бырыһыаннара ханна сутуллубуттарын билбэттэр. Кэлэктиибинэн иммунитеттаныахтаахпыт.  Биисинэс хас биирдии гражданины ким буоларыттан тутулуга суох бэрэбиэркэлиэхтээх (куарга)”, — диир.

Сорохтор куар олохтонно даҕаны бу ирдэбил барыларыгар туруохтаах диэн санааларын эттилэр.

Онон хамсык хаптайарын туһугар 2 нэдиэлэ устата 800 бэрэбиэркэ ыытыллан, 38 боротокуол толоруллубут.

Бэлэмнээтэ Женни Стрюкова

Хаартыска: интэриниэттэн

0
0