“Бэтэрээннэр тустарынан” федеральнай сокуоҥҥа олоҕуран, 2005 с. ахсынньы 22 күнүгэр “Үлэ бэтэрээннэрин туһунан” Саха Өрөспүүбүлүкэтин бырабыыталыстыбатын уурааҕа тахсыбыта.
Онно “Үлэ бэтэрээнэ” аат Сэбиэскэй Сойуус эбэтэр Арассыыйа Федерациятын уордьанынан, мэтээлинэн наҕараадаламмыт, биэдэмистибэннэй знагынан бэлиэтэммит итиэннэ норуот хаһаайыстыбатыгар уһун сылларга үлэлээбит дьоҥҥо бэриллэрэ, уопсай үлэ ыстааһа эр киһиэхэ 40, дьахтарга 35 сыл буолара ыйыллыбыта.
Бу уураахха кэккэ уларытыылар киллэрилиннилэр. Бастатан туран, эр киһи 25 сыл, дьахтар 20 сыл өрөспүүбүлүкэҕэ үлэлээбит ыстаастаах буолара, ону таһынан, биир эйгэҕэ, тэрилтэҕэ 15 сылтан итэҕэһэ суох үлэлиирэ ирдэннэ. Итинэн уһуннук үлэлээбит эрэ буолбакка, өрөспүүбүлүкэ сайдыытыгар кылаатын киллэрбит киһи өрөспүүбүлүкэ суолталаах “Үлэ бэтэрээнэ” буолара олохтонно. Иккиһинэн, үлэлээбэт бэтэрээн үс сылга биирдэ өрөспүүбүлүкэ санаторийдарыгар уонна куруортарыгар эмтэнэр, доруобуйатын бөҕөргөтөр, онуоха путевка сыанатын 80 %-ын бүддьүөт уйунар, 20 %-ын бэтэрээн бэйэтэ төлүүр буолла. Бу туһунан бырабыыталыстыба мунньаҕар үлэ уонна социальнай сайдыы миниистирэ Александр Михеев иһитиннэрдэ.
Ыспыраапка
2017 сыл тохсунньу 1 күнүнээҕи чахчынан, Саха Өрөспүүбүлүкэтин үрдүнэн 125 тыһ. 334 (Россия Федерацията таһымнаах – 63 тыһ. 322, өрөспүүбүлүкэ таһымнаах – 62 тыһ. 12) үлэ бэтэрээнэ баар.
Раиса Сибирякова, “Саха сирэ” хаһыат, edersaas.ru