Ааспыт өрөбүллэр успуорка байанайдаах буоллулар. «Күүстээх норуот күүстээх кыыһа» Сардаана Трофимова Арассыыйа чөмпүйэнээтигэр кыайыан кыайда. Саха норуотун үөрдүбүт дьоруойу кытары кэпсэттим.
— Сардаана, бастатан туран, олимпийскай нормативы толорбуккунан эҕэрдэ! Эн сүүрэргин ким күөх экранынан, ким төлөпүөнүнэн, Саха сирэ барыта көрдө быһыылаах. Сүүрүүгүнэн астынныҥ дуо?
— Астынан. Тириэньэрбин кытары эрдэттэн нормативы толоробут диэн санаалаах дьарыктаммыппыт, стартаабыппыт. Ол эрээри, бу трасса арыый уһун эбит. 43 килэмиэтиртэн тахса буолбута. Ханнык баҕарар марафоҥҥа син биир кыратык 400-500 миэтэрэ кэриҥэ эбии сүүрэҕин. Ол эрээри, бу курдук килэмиэтиртэн элбэҕэ эбии мэһэй. Биир килэмиэтир диэн сыалай үс мүнүүтэ. Онон, көрдөрүүм өссө үчүгэй буолуо этэ.
— Бу күрэхтэһиигэ бэлэмнэнииҥ атыттартан туох уратылаах этэй?
— Барыта (күлэр). Тоҕо диэтэр, мин бастакыбын биир сезоҥҥа икки марафону сүүрдүм. Онон бэлэмнэниим эмиэ олох атын этэ. Киргизияҕа дьарыктана сырыттахпына, кыраныысса сабыллыах курдук балаһыанньа үөскээбитэ. Ол иһин түргэн үлүгэрдик Кисловодскайга кэлэн салгыы дьарыктаммытым. Балтараа ый иһигэр икки марафону сүүрэр уйулҕа өттүнэн ыарахан эбит. Киһи санаатаҕына да, сылайар. Ол эрээри, этим-сииним барытын үчүгэйдик толордо, тулуйда.
— Эн ханнык хаачыстыбаларыҥ успуорка өр кэмҥэ бастыҥнар истэригэр сылдьаргар көмөлөһөрүй?
— Гороскоппунан хой буоларым быһыытынан, өһөс санаам марафоҥҥа көмөлөһөр. Ол эрээри, тус олохпор бу хаачыстыбам кыратык мэһэйдиир (күлэр).
— Эн ханнык эрэ интервьюгар, Усейн Болту көрсөр баҕа санаалаахпын диэн эппитиҥ. Билигин даҕаны ол баҕа санааҕын толорор санаалааххын дуо? Көрүстэххинэ, тугу гыныаҥ этэй?
— 2016 сыллаахха Олимпиадаҕа бараары оҥосто сырыттахпына, быраатым Болт мэтириэттээх куурка, доҕотторум полароид-фотоаппараат бэлэхтээбиттэрэ. Полароидка уһулуччу сүүрүгү кытары хаартыскаҕа түһэн баран, тута илии баттатан ылыахтаах этим. Билигин даҕаны ол баҕа санаам баар.
— Күрэхтэһии иннинэ туох эмэ сиэри оҥорор үгэстээххин дуо?
— 2012 сыллаахха тириэньэрим илиигэ кэтэр браслет бэлэхтээбитэ. Ону хас биирдии күрэхтэһиигэ, ыарахан дьарыкка илдьэ барабын. Биирдэ бу браслеппын малым быыһыгар сүтэрэн кэбиспитим. Наһаа хомойбутум, онтум кроссовка иһигэр киирэн хаалбыт этэ (күлэр). Өссө хас биирдии ыарахан дьарык уонна, биллэн турар, старт иннинэ сирэйбин-харахпын оҥосторбун (макияж) сөбүлүүбүн. Таҥаспар улахан болҕомто уурабын. Оннукка хомуллабын, күүспэр-күүс эбиллэргэ дылы буолар.
— Иваново оҕото кубик рубиктан эн мэтириэккин улахан хартыына оҥорбутун инстаграм ситимигэр укпут этэ…
— Ити уол инстаграм сирэйигэр эрдэттэн сурутуулаах этим. Бэйэтэ сүүрүк буолан, атын сөбүлүүр спортсменнарын эмиэ хартыына оҥорбутун сэҥээрэ көрөөччүбүн. Бу уол сүүс миэтэрэҕэ сүүрэн иһэн саамай түргэнник кубик рубигы хомуйан, Гиннес рекордун кинигэтигэр киирэн турардаах. Мин соһуйдум, уйадыйдым да диэххэ сөп.
— Ити хартыынаны бэлэхтээтэ дуо?
— Суох, кубик рубиктан оҥоһулуннаҕа дии. Салгыы өссө кими эрэ оҥоруо турдаҕа.
— Салгыы туох былааннар баалларый?
— Дойдубар кыратык сынньанан баран, төттөрү Москваҕа баран дьарыктаныахпын наада. Тоҕо диэтэххэ, Дьокуускайга саалалар бары сабыллан тураллар. Онтон ахсынньы 26 күнүгэр кэлэн, дьиэ кэргэммин кытары Саҥа дьыллыыр былааннаахпын. Уонна кэлэр сылы онуоха-маныаха диэри туох да диэн этэр кыаҕым суох.
— Кэпсээниҥ иһин махтал, Сардаана!
Виктория Бястинова, edersaas.ru