Биир ойуур баһаара баара бэлиэтэнэр

Бөлөххө киир:

Бэс ыйын 2 күнүгэр өрөспүүбүлүкэтээҕи суһал ыстаап брифинигэр Нэһилиэнньэ олоҕор куттала суох буолууну хааччыйар судаарыстыбаннай кэмитиэт бэрэссэдээтэлин солбуйааччы Иннокентий Андросов иһитиннэрбитинэн, ойуурга баһаар балаһыанньата этэҥҥэ.

Бүгүҥҥү туругунан, Ленскэй оройуонун уонна Иркутскай уобалас быысаһыыларынан биир ойуур баһаара умайара бэлиэтэнэр. Нэһилиэнньэлээх пууннартан ыраах, суола-ииһэ суох сиргэ баар буолан, умуруорарга уустуктардаах. Ол эрэн, нэһилиэнньэлээх пууннарга кэлэр куттала суоһаабат.

Өрөспүүбүлүкэ үрдүнэн 10 улууска уонна Дьокуускай куорат таһынан 11 сөмөлүөт көтөн, ойуур баһаарын балаһыанньатын кэтээн көрөллөр, хонтуруоллууллар. Быйыл кыра да баһаар үөскээтэҕинэ, улаатыннарбакка, тута умуруоран иһэр уопуту туһаналлара көдьүүстээх.

Бүгүн Як-42 зондировщик-сөмөлүөт илин эҥээр улуустарга ардаҕы ыҥырарга үлэлиэҕэ. Бу курдук ардаҕы ыҥырыы кураантан үөскүүр ойуур баһаардарын умуруорууга, сэрэтиигэ үчүгэй түмүктээҕэ көстөр.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

+1
0
+1
0
+1
0
+1
0
+1
0
+1
0
+1
0