“Биир ньыгыл Россия” баартыйа чилиэннэрэ бу сыллааҕы үлэлэрин түмүгүн уонна 2019 сылга туох былааннаахтарын бүгүҥҥү конференцияларыгар кэпсэттилэр. Ону таһынан баартыйа XVIII съеһигэр дэлэгээттэри таллылар.
Баартыйа Саха сиринээҕи отделениетын сэкирэтээрэ Сахамин Афанасьев 2018 сыллааҕы түмүгү таһаарыгар быйыл балаҕан ыйыгар ыытыллыбыт быыбарга “Биир ньыгыллар” үчүгэй көрдөрүүлээхтэрин бэлиэтиир. Санатан эттэххэ, быйыл биһиги өрөспүүбүлүкэбитигэр Ил Дархан быыбарын сэргэ, Ил Түмэн уонна муниципальнай быыбардар ыытыллыбыттара. Бу быыбардарга “биир ньыгыллар” “Саха сирэ иннибит хоту” диэн ыҥырыы тылынан кыттыбыттара. Ил Дархан быыбарыгар “Биир ньыгыл Россияттан” Айсен Николаев кыттан, куоластааччылар 71 тахса бырыһыаннарын ылбыта. Ил Түмэҥҥэ баартыйа 43 чилиэнэ киирбитэ. Бэйэ кандидатуратын туруорунан кыттыбыт дьону ааҕан туран, 46 киһи. Оттон муниципальнай быыбардарга “биир ньыгыллар” кандидаттара баһыйар үгүс сиргэ кыайбыттара.
Билиҥҥи туругунан, баартыйа өрөспүүбүлүкэ үрдүнэн 30 910 чилиэннээх. Ити быыбардааччылар уопсай ахсааннарыттан 5 % ылар. Ону сэргэ, баартыйа туһатыгар үлэлиир 11 766 киһи баар. Манна даҕатан, Сахамин Миланович баартыйа олохтоох салааларыгар бэрэбиэркэни ыытарга, саҥа чилиэннэри ылыыга үлэлэһэллэригэр, усунуоһу төлөөһүҥҥэ үлэни ыытарга, дьоҥҥо-сэргэҕэ сырдатар үлэни күүһүрдэргэ эттэ.
Эһиилги былааны кэпсииригэр кини 2019 сылга буолуохтаах быыбардарга барыларыгар “Биир ньыгыл Россия” көхтөөхтүк кыттыаҕын иһитиннэрдэ. Санатан эттэххэ, эһиил үгүс муниципальнай тэриллиилэргэ баһылыктар уонна дьокутааттар быыбардара ыытыллар.
Конференция кэмигэр баартыйа политсэбиэтин саҥа чилиэннэрин таллылар. Ол курдук, сэбиэккэ Ил Түмэн дьокутааттара Семен Березин, Феодосия Габышева, Андрей Находкин, Владимир Чичигинаров, Ньурбатааҕы хайа-байытар кэмбинээтин дириэктэрэ Анатолий Платонов, Дьокуускай куорат дууматын бэрэссэдээтэлэ Альберт Семенов киирдилэр. Баартыйа хонтуруоллуур хамыыһыйатыгар дьокутаат Ньургуйаана Захарова эбии талылынна.
Баартыйа бүтүн Россиятааҕы XVIII съеһигэр дэлэгээттэринэн Хаҥалас улууһуттан Айаана Анастатова, Эдьигээнтэн Сергей Корякин, Чурапчыттан Афанасий Максимов, Ньурбаттан Мария Николаева, Намтан Иван Попов, Өлөөнтөн Константин Соломонов барыахтара. Съезд ахсынньы 7-8 күннэригэр Москваҕа ыытыллыаҕа.
Аграфена КУЗЬМИНА, “Саха сирэ” хаһыат.