“Биир ньыгыллар” салайааччыларын таллылар

Бөлөххө киир:

Бүгүн “Биир ньыгыл Россия” Саха сиринээҕи отделениета сылы түмүктүүр конференциятыгар сэкирэтээрин быыбардаата. 91 дэлэгээттэн 70 куолаһы ылан, Александр Ноговицын “Биир ньыгыл Россия” Саха сиринээҕи отделениетын салайааччытынан иккиһин талылынна.

Аграфена КУЗЬМИНА, «Саха сирэ» хаһыат, https://edersaas.ru/

“Былааннаммыт үлэбитин салгыы толорон иһиэхпит. Ону сэргэ РФ президенин Анал этиитигэр этиллибит түөрт бырайыак киириэҕэ. Ордук нэһилиэнньэлээх пууннары тупсарыыга болҕомтобутун ууруохпут”, — диэн бэлиэтиир үлэтин туһунан Александр Александрович суруналыыстарга.

Санатан эттэххэ, Александр Ноговицын, Дмитрий Глушко бу дуоһунастан барбытынан, “биир ньыгыллар” лидердэринэн былырыын талыллыбыта. Билигин кини Ил Түмэҥҥэ баартыйа фракциятын салайар. Бүддьүөтү, науканы, үөрэҕи, култуураны, доруобуйа харыстабылын, социальнай эйгэни көрөр сис кэмитиэттэр чилиэннэрэ.

Кини өссө сэтинньигэ үлэтин уларытан, Олох-дьаһах, коммунальнай хаһаайыстыба генеральнай дириэктэриттэн уурайан, “Сахатранснефтегаз” ААУо дириэктэрдэрин сэбиэтин бэрэссэдээтэлинэн анаммыта.

“Генеральнай дириэктэр буолан олорон, баартыйа регионнааҕы отделениетын салайар күчүмэҕэй. Онон билигин баартыйаҕа улахан болҕомтобун ууран үлэлиэҕим. Ордук олохтоох салайыныыга. Муниципальнай быыбардар оруоллара олус улахан”, — диэн этэр Александр Ноговицын үлэтин хайысхатын туһунан.

Конференцияҕа регионнааҕы отделение уонна хонтуруоллуур хамыыһыйа биэс сыллаах үлэтин түмүгүн иһитиннэрдилэр. Санатан эттэххэ, быйыл баартыйа тэриллибитэ 15 сылын бэлиэтиир. Маны таһынан конференцияҕа баартыйа бэрэссэдээтэлэ Дмитрий Медведев уопсастыбаннай приемнайын, баартыйа биир санаалаахтарын сэбиэтин, “Эдэр гвардия” үлэтин-хамнаһын билиһиннэрдилэр. Түмүккэ политсэбиэт, хонтуруоллуур хамыыһыйа чилиэннэрин таллылар. Ону сэргэ тохсунньу 21 күнүгэр буолар бүтүн Россиятааҕы съезкэ Саха сириттэн барар алта дэлэгээти бигэргэттилэр.

Ыспыраапка:

Александр Ноговицын 1972 с. ахсынньы 15 күнүгэр Кэбээйи оройуонун Сангаарыгар төрөөбүтэ. 1995 с. Илиҥҥи-Сибиирдээҕи технологическэй судаарыстыбаннай университеты, 2006 с. СГУ, 2010 c. Судаарыстыбаннай сулууспа Россиятааҕы академиятын үөрэнэн бүтэрбитэ.

Үлэтин Кэбээйиттэн саҕалаабыта. “Кобяйбытуслуги” тэрилтэҕэ бастаан маастарынан, кэлин дириэктэри солбуйааччынан үлэлээбитэ. Онтон “Сангарэнергоҕа”, оройуоннааҕы ОДЬКХ управлениетыгар үлэлээн баран, 2000 сылтан Олох-дьаһах, коммунальнай хаһаайыстыба министиэристибэтигэр, Кэбээйи улууһун биир кэлим сакаасчытын дирекциятыгар, “Стройкомплект” тэрилтэҕэ үлэлээбитэ. 2006-2010 сс. ОДЬКХ уонна энергетика миниистирин солбуйааччынан сылдьыбыта. 2010-2016 cc. “ОДЬКХ” ГУП генеральнай дириэктэринэн үлэлээбитэ. Сэтинньиттэн “Сахатранснефтегаз” ААУо дириэктэрдэрин сэбиэтин бэрэссэдээтэлинэн үлэлээн эрэр.

Аграфена КУЗЬМИНА.

+1
0
+1
0
+1
0
+1
0
+1
0
+1
0
+1
0