«Биир ньыгыл Арассыыйа» баартыйа Саха сиринээҕи салаатын сэкирэтээрэ талылынна
Бэҕэһээ, сэтинньи 7 күнүгэр, Саха сирин идэлээх сойуустарын дьиэтин саалатыгар «Биир ньыгыл Арассыыйа» Бүтүн Арассыыйатааҕы политическай баартыйа Саха сиринээҕи региональнай салаатын уочарата суох кэмпириэнсийэтэ буолла. Кэмпириэнсийэҕэ “Биир ньыгыл Арассыыйа” Саха сиринээҕи салаатын сэкирэтээрин, Президиум чилиэннэрин таллылар, исполком салайааччытын анаатылар. Ону таһынан, Москваҕа буолаары турар “Биир ньыгыл Арассыыйа” бааартыйа XIX сийиэһигэр дэлэгээттэри быһаардылар.
edersaas.ru
“Биир Ньыгыл Арассыыйа” региональнай салаатын сэкирэтээринэн кистэлэҥ куоластааһын түмүгүнэн, биир санаанан өрөспүүбүлүкэ Ил Дархана Айсен Николаев талылынна.
Айсен Николаев суруналыыстары кытта көрсүһүүгэ: “Биир ньыгыл Арассыыйа» баартыйа сыала — норуот итэҕэлин төннөрүү буолар. Арассыыйаны барытын, өрөспүүбүлүкэни салайан олорор былаас баартыйата хайаан да норуот итэҕэлигэр тирэҕириэхтээх уонна салгыы өрөспүүбүлүкэҕэ ыытыллар уларыйыылары норуоту кытта бииргэ оҥоруохтаах. Ити өттүгэр күүстээх үлэни ыытыахпыт. Хомойуох иһин, кэнники сылларга “Биир ньыгыл Арассыыйа” баартыйа наар кириитикэлэнэн, сыыһа соҕус хайысханан баран хаалла. Билигин, норуот интэриэһин көмүскүүр уонна өрөспүүбүлүкэ сайдыытыгар үлэлиир баартыйа буолуохтаахпыт”,- диэн эттэ.
Баартыйа Исполкомун салайааччытынан “МИН-ИНЖЕНЕРБЫН” диэн техническэй идэлээхтэр координационнай кииннэрин бэрэссэдээтэлэ Владимир Аммосов ананна.
“Биир ньыгыл Арассыыйа” баартыйа Саха сиринээҕи салаата киэҥ соруктары ылынан, күүстээх үлэҕэ турунна.
Ньургуйаана Иванова, edersaas.ru