Балаҕан ыйын 11 күнүгэр Арассыыйа үрдүнэн биир кэлим куоластыыр күн ыытылынна. Саха сиригэр тоҕус улуус баһылыгын таһынан 189 нэһилиэккэ баһылыктар талылыннылар. Барыллаан түмүгүнэн, “Биир ньыгыл Арассыыйа” баартыйа туруорбут кандидаттара нэһилиэктэргэ бастаан иһэллэр.
Балаҕан ыйынааҕы быыбарга “Биир ньыгыл Арассыыйа”, “Сиэрдээх Арассыыйа-кырдьык туһугар”, “КПРФ”, “ЛДПР”, “Биэнсийэлээхтэр баартыйалара”, “Гражданскай платформа”, “Родина”, “Социальнай харыстабыл баартыйата”, “Дьыала баартыйата” бэйэлэрин кандидаттарын туруорбуттара. Быыбар түмүгүн барыллаан ааҕыынан, нэһилиэктэргэ үгүстэригэр “Биир ньыгыл Арассыыйа” баартыйа туруорбут кандидаттара бастаан иһэллэр. Холобур, Үөһээ Бүлүүгэ Боотулуга, Дүллүкүгэ, Кырыкыйга, Ороһуга, Туобуйалаахха, Хомустаахха, Хороҕо сүрүн баартыйа кандидаттара баһыйар үгүс куолаһы ылан иһэллэр. Хаҥалас Хачыкаатыгар, 2 Дьөппөнүгэр, Кытыл Дьураатыгар, Нөмүгүтүгэр, Өктөмүгэр, Төхтүрүгэр “биир ньыгыллар” утарылаһааччыларын куоһардылар. Онон кыайбыт нэһилиэк баһылыктара — бары кэриэтэ былаас баартыйатын бэрэстэбиитэллэрэ.
Түмүгү барыллаан ааҕыынан, тоҕус улуустан алтатыгар “Биир ньыгыл Арассыыйа” баартыйа туруорбут кандидаттара бастаан иһэллэр, икки улууска “Биир ньыгыл Арассыыйа” чилиэннэрэ кыайдылар. Биир улууска “Сиэрдээх Арассыыйа” баартыйа туруорбут кандидата кыайыыны ситистэ.
Улуус кииннэрин ыллахха, 13 талыллыбыт кандидаттан 11-ин «Биир ньыгыллар» туруорбуттар, 2 — бэйэлэрин бэйэлэрэ туруоруммуттар, 1 — ЛДПР.
Аграфена КУЗЬМИНА