Бүгүн Дьокуускай куорат Комсомольскай болуоссатыгар саҥа оптуобус күлүүстэрин оскуолаларга туттардылар. РФ бырабыыталыстыбатын дьаһалынан быйыл 77 регион оскуолаларыгар 1549 оптуобус атыылаһыллыбыта.
Итинтэн Саха сиригэр 38 оскуола саҥа массыынаны ылла. Оптуобус бары өттүнэн оҕолору тиэйэргэ аналлаах. Арыаллыыр икки киһиэхэ анал олбохтоох, ГЛОНАСС систиэмэлээх, алын кылаас оҕолоро киирэллэригэр-тахсалларыгар анал кыра кирилиэс курдуктаах.
СӨ Судаарыстыбаннай Мунньаҕын бэрэссэдээтэлэ Ольга Балабкина: “Оҕолору тиэйии эппиэтинэстээх. Онон сүрүн болҕомто итиннэ ууруллар. Маннык бырайыактарынан тустаах баартыйа өссө дьарыктаныа. Онон инники өттүгэр өрөспүүбүлүкэ оскуолалара саҥа тимир көлөлөрүнэн хааччылла туруохтара”, — диэн эттэ.
Феодосия Габышева, СӨ Үөрэххэ уонна наукаҕа миниистирин 1-кы солбуйааччы:
— Өрөспүүбүлүкэ оскуолаларыгар үөрүүлээх түгэн буолла. Өр сыллар кэннилэриттэн сүрүн баартыйа көҕүлээһининэн, “Оскуола оптуобустара” бырайыак сөргүтүлүннэ. Онон үгүс оскуола саҥа массыыналарынан хааччылыннылар.
* * *
Аан маҥнайгынан саҥа оптуобус күлүүстэрин Амма уонна Мэҥэ Хаҥалас улуустарын оскуолалара туттулар. Онон ПАЗ оптуобуһу Алдан улууһун Хатыыстыыр, Бэрдьигэстээх орто, Ларионов аатынан Майа орто, Ньурба 2 нүөмэрдээх орто, Антоновка орто, Өлүөхүмэ улууһун Абаҕытын орто, Бүлүүтээҕи 1 нүөмэрдээх начальнай оскуола, Орто Халыматааҕы орто, Сунтаар улууһун Куокуну, Хаҥаластааҕы орто оскуолалара уонна өрөспүүбүлүкэтээҕи анал интернат-оскуола, Дьокуускайдааҕы кадеттар оскуолалара уонна Амма лиссиэйэ ыллылар.
Оттон ГАЗ оптуобустар Алдан, Амма, Үөһээ Бүлүү, Дьааҥы, Бүлүү, Кэбээйи, Мэҥэ Хаҥалас, Нам, Сунтаар, Таатта, Томпо, Уус Алдан, Хаҥалас, Чурапчы, өрөспүүбүлүкэтээҕи анал оскуола-интернакка уонна өрөспүүбүлүкэтээҕи истибэттэр оскуолаларыгар бэрилиннилэр.
Александр Тарасов, «Саха сирэ» хаһыат, edersaas.ru