“Биир ньыгыл Арассыыйа” үлэлээччилэргэ биэнсийэлэрин индексациялааһыны төнүннэрэр туһунан этии киллэрдэ
Баартыйа көҕүлээһинэ үлэлиир бары категория биэнсийэлээхтэргэ индексацияны чөлүгэр түһэриигэ туһуланар.
“Судаарыстыбаннай Дуумаҕа “Биир ньыгыл Арассыыйа” баартыйа фракцията үлэлиир дьоҥҥо биэнсийэлэрин индексациялааһыны чөлүгэр түһэрэр туһунан этиини бэлэмнээн, миниистирдэр кэбиниэттэригэр ыытта,» — диэн Судаарыстыбаннай Дуумаҕа фракция салайааччытын солбуйааччы Андрей Исаев эппитин туһунан ТАСС иһитиннэрэр.
“Биһиги маннык ис хоһоонноох этиини бырабыыталыстыбаҕа киллэрбиппит. Билигин этиибитигэр хоруй ылыахпыт диэн эрэнэбит. Биллэн турар, бу тиэмэни Биэнсийэ пуондатын уонна Үлэ министиэристибэтин кытта дьүүллэспиппит”, — диэтэ Андрей Исаев.
Фракция көҕүлээһиннэрэ үлэлиир биэнсийэлээх дьоҥҥо индексацияны биирдэ чөлүгэр түһэриигэ туһуланар, диэн парламентарий быһаарда. “Табыллыбыт барылы кыайан олоххо киллэрбэтэхпитинэ, биһиэхэ атын да этиилэр бааллар”, — диэтэ кини.
Арассыыйа бэрэсидьиэнэ Владимир Путин үлэлиир биэнсийэлээхтэргэ биэнсийэлэрин чөлүгэр түһэриигэ этиилэри бэлэмнииригэр бырабыыталыстыбаҕа соруйбута. Кини ылыныллыбыт Төрүт Сокуоҥҥа биэнсийэни сылга бииртэн итэҕэһэ суох индексациялыырга үлэлиир уонна үлэлээбэт биэнсийэлээх диэн араарыы суох диэбитэ.
Төрүт Сокуоҥҥа киирбит уларытыыларга олоҕуран, биэнсийэни индексациялааһын федеральнай сокуоҥҥа олоҕуран сылга бииртэн итэҕэһэ суох ыытыллыахтаах. Маныаха Конституцияҕа үлэлиир биэнсийэлээхтэргэ ыйыллыбыт нуорма сыһыаннааҕа дуу, суоҕа чопчуламмат.
Үлэлээччилэргэ биэнсийэлэрин индексациялааһын 2016 сыл тохсунньу 1 күнүттэн ыла ыытылла илик, ити Арассыыйа Биэнсийэҕэ пуондатын үбэ тиийбэтин аччатар туһугар оҥоһуллубута. Бу иннинэ Үп миниистирэ Антон Силуанов үлэлиир биэнсийэлээхтэргэ хамнас аахсалларын иһин биэнсийэлэрин үрдэппэттэр диэн турардаах.
Сахагов саайтыттан Женни Стрюкова бэлэмнээтэ
Хаартыска: тустаах саайтан