Нам улууһун Бартыһаан нэһилиэгэр алтынньы 13 күнэ Дьоро күнүнэн биллэриллибитэ мээнэҕэ буолбатах.
edersaas.ru
Бу күн олохтоохтор аан бастаан сэлиэнньэҕэ киирэр айан аартыгар “Партизан” диэн стела ууруллуутугар муһуннулар. Стела дизайнын худуоһунньук А.А.Федосеев оҥорбут. Долгутуулаах түгэн Геннадий Игнатьев алгыһынан арылынна. Кыһыл лиэнтэни Нам улууһун баһылыга Ю.И. Слепцов, Бартыһаан нэһилиэгин баһылыга А.Н. Зырянов үөрүүлээх быһыыга-майгыга быстылар.
Бу күн олохтоохторго элбэх үөрүүлээх түгэн тосхойдо. Ол курдук, түөлбэлэринэн күрэх кыайыылаахтара — «Парковай» түөлбэ олохтоохторо оҕо оонньуур былаһааккатын тутан үөрүүлэрэ үксээтэ.
Ону тэҥэ, Бартыһаан киинигэр, Баалла күөл үрдүгэр «Тапталлаахтар сквердэригэр» эмиэ аалай лиэнтэ быһылынна. Сквер тутуллуутун Н.Н.Петров уонна Бартыһаан баһылыгын солбуйааччы П.И.Скрябина көҕүлээннэр, Махтал сурук туттулар.
Олохтоох бибилэтиэкэҕэ иистэнньэҥнэр Л.С.Иванова, С.В.Шепелёва сиэлинэн оҥоһуктарга маастар-кылаас ыыттылар. Эдэр, талааннаах ырыаһыттар Октябрина Сивцева уонна Владислав Барамыгин сэргэх ырыанан ыалдьыттары, олохтоохтору эҕэрдэлээтилэр.
Ити курдук, олохтоохтор нэһилиэктэрэ өссө киэргэйбититтэн санаалара көнньүөрэн, кыстыкка үчүгэй настарыанньалаах киирэллэрин астына бэлиэтээтилэр, махталларын эттилэр.
Ньургуйаана СКРЯБИНА-САЙДЫЫНА, edersaas.ru сайтка анаан.