Маны аах Уопсастыба

Биир кыбартыыраттан сүүсчэкэ куосканы хайдах быыһыыбыт

Дьокуускай куорат Кеша Алексеев уулуссатын биир дьиэтигэр сүүһүнэн куоска хаайтаран олорбут.

Бу куоскалары ол дьиэҕэ олорбот дьахтар иитэн, тастарыттан хатаан, сүгүн аһаппакка да хас да сыл туппут. О түмүгэр куоска ахсаана аһары элбээбит. Кыбартыыраҕа ыаллыы олорор дьон куоска сыта-сымара, ньааҕынаһыыта сүгүннээбэтиттэн ыксаан үҥсүбүттэр.
Дьокуускай куорат кыыллары көмүскүүр волонтера Злата Сычева манна тиийэн ол дьиэттэн 14 куосканы тутан ылбыт. Куоскалар аччыктара бэрдиттэн дьиэ истиэнэтин, обуойун кирэн, баар миэбэли барытын тэпсэн бүтэрбиттэрин тус страницатыгар инстаграмҥа таһаарбыт. Куоскалары ким да ылбатаҕына, улахан кыһалҕаттан утутар эрэ суол баарын туһунан суруйбут. Сэтинньи 27-28 күннэригэр кыыллары тутар пууҥҥа аһаҕас аан күннэрэ буолбуттара. Манна ким баҕалаах кэлэн бэйэтигэр ыт, куоска ылыан сөп. Бу күн уопсайа уонтан тахса кыылы дьон иитээри дьиэлэригэр илдьибиттэр. Волонтер Злата Сычева маннык кэпсиир:
— Икки күн устата кыыллары тутар пууҥҥа аһаҕас аан күннэрэ буоллулар. Пууҥҥа куосканы тутар усулуобуйа суоҕунан ыттары эрэ туталлар. Ааспыт нэдиэлэҕэ кыбартыыраҕа куоскалары иитэр дьахтар туһунан үҥсүү уокурукка киирбит. Бу кыбартыыраны уокурук арыйан, волонтердар тиийэммит уопсайа 14 куосканы ыллыбыт. Кыбартыыра муниципальнай, куоскалары иитэр дьахтар манна олорбот. Киһилии көрбөккө, кыыллар киргэ-хоххо буккуллан, ыйга биирдэ аһаан сылдьыбыттар. Уокурук бу кыбартыыраны биэс оҕолоох ийэҕэ биэриэхтээх эбит да, киһи олорор усулуобуйата суох буолбут. Оннук ынырык сыттаах-сымардаах, аһары элбэх куоска төрөөн-ууһаан бэйдиэ тэпсибиттэр. Киһи бу дьиэҕэ олорор дьону уонна көрүүтэ суох сылдьыбыт кыыллары аһынар. Эппиэтинэһэ суох дьонтон сылтаан маннык таҕыстаҕа. Билиҥҥитэ куоскалар волонтердарга түҥэтиллибиттэрэ. Антах кыбартыыраҕа өссө да элбэх куоска хаалла. Киһиэхэ таба туттарбаттар, куоталлар, куттаналлар. Көмө наада. Аҕыйах ахсааннаах волонтер үлэтэ биллэр буоллаҕа. Онон амарах санаалаах куорат олохтоохторо, бу кыһалҕаттан туора турумаҥ, көмөлөһүөҕүҥ!

Ульяна ЗАХАРОВА.

1
0
Telegram @edersaas20