ДПС анал взводун иниспиэктэрдэрэ «Халыма» федеральнай суол 399 километрыгар биир массыынаны тохтоппуттар. Бу Иркутскай уобаластан төрүттээх 40 саастаах киһиттэн бакыакка сууламмыт араҕас өҥнөөх металлы булбуттар.
Экспертиза быһаарбытынан, бу металл 1 киилэ 255 г кэриҥэ ыйааһыннаах, 2 мөл. 800 тыһ. солк. сыаналаах кыһыл көмүс эбит.
СӨ ИДьМ-тын Экономическай буруйдары уонна хоруупсуйаны утары охсуһар управлениетын оперативниктара суһал-ирдиир тэрээһиннэр кэмигэр быһаарбыттарынан, бу көмүһү Өймөкөөн улууһугар баар хайа-байытар кэмбинээттэн уорбуттар.
Уорууга сыһыаннаах уорбаланааччылары быһаарбыттар — бу тутуллубут киһи ити кэмбинээккэ үлэлиир 36 саастаах аймаҕа уонна кини бииргэ үлэлиир 28, 50 саастаах дьоно эбиттэр.
Барыллаан быһаарыынан, бу 36 уонна 28 саастаах көмүһү уоран баран, 50 саастаах суоппарга 100 тыһ. солк. манньаҕа кэмбинээт таһыгар таһаартарбыттар.
Маны таһынан, уорбаланааччылары тутуу кэмигэр суоппартан наркотик булбуттар.
Бу чахчыларынан хас да ыстатыйанан холуобунай дьыалалар тэриллибиттэр.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыскалар: СӨ ИДьМ-тын пресс-сулууспата.