Биир киһиэхэ 280 грамм хортуоппуй, 80 грамм үүт тиксэр

Бөлөххө киир:

Бүгүҥҥү туругунан, күннээҕи ороскуот алын кээмэйэ биһиги өрөспүүбүлүкэбитигэр үлэлиир киһиэхэ 16 тыһ. 974 солк., оҕоҕо 16 тыһ. 704 солк. тэҥнэһэр.

Анивера Акимова, «Саха сирэ» хаһыат, https://edersaas.ru/

Күннээҕи ороскуот кээмэйэ икки зонаҕа арахсар. Бастакы зонаҕа Абый, Аллайыаха, Анаабыр, Булуҥ, Үөһээ Халыма, Дьааҥы, Эдьигээн, Муома, Аллараа Халыма, Өймөкөөн, Өлөөн, Орто Халыма, Усуйаана, Эбээн-Бытантай итиэннэ Айхал, Удачнай бөһүөлэктэр киирэллэр. Иккискэ – киин, соҕуруу уонна арҕаа улуустар.

Бу кээмэй “Киһи нэһиилэ тиийинэн олорор нуорматын ааҕан таһаарыы” диэн 90-с сыллар саҥаларыгар оҥоһуллубут анал докумуоҥҥа олоҕуран ааҕыллар. Бу ыйыллыбыт суумаҕа туһанааччы корзината киирэр. Ол курдук корзинаҕа килиэп, куруппа араас көрүҥэ, хортуоппуй, оҕуруот аһа, фрукта, саахар, бурдук аһылык, эт, балык, үүт, сымыыт, арыы, туус, чэй уонна да атын киһиэхэ наадалаах бородуукталар киирэллэр. Маны таһынан, күннээҕи ороскуокка таҥас-сап, коммунальнай өҥөлөр, эмп-том, уу, уот, гаас төлөбүрдэрэ киирэллэр. Ол эрээри үгүс өттүгэр халбаҥныы турар сыаналаах регионнарга бу суума  олох эппиэттэспэт. Сорох регионнар олохтоохторо нэһиилэ тиийинэн олоруу кээмэйиттэн быдан намыһах хамнаһы аахсаллар.

РФ бырабыыталыстыбата бигэргэппитинэн, 2016 сылга улахан киһи биир күннээҕи аһын-үөлүн кээмэйин ылан көрдөххө, 280 грамм хортуоппуй, 300 грамм килиэп, 80 грамм үүт (эбэтэр үүт аһылык), 160 грамм эт, 50 грамм балык, 40 грамм үүнээйи арыыта, 160 грамм сибиэһэй фрукта, 300 оҕуруот аһылыга, 60 грамм минньигэс аһылык, биир сымыыт аҥаара тиксэр эбит. Бу ааспыт сыллааҕы көрдөрүүлэр. Быйылгы бигэргэнэ илик.

Оттон өрөспүүбүлүкэҕэ хамнас алын кээмэйэ (МРОТ)-  16 тыһ. 824 солк., оттон орто кээмэйэ 56 тыһ. 119 солк. тэҥнэһэр.

Анивера Акимова, «Саха сирэ» хаһыат, https://edersaas.ru/

+1
0
+1
0
+1
0
+1
0
+1
0
+1
0
+1
0