Култуура Уопсастыба

Биир кэнсиэртэн ситимнэммит иэйиилэр

Кулун тутар 8 күнүгэр Суорун Омоллоон аатынан Опера уонна балет тыйаатырыгар гала-кэнсиэр «Дьол тааһа» киинэҕэ Кирилл Матвеев толорбут ырыатыттан саҕаланна.

edersaas.ru

Улахан эрэ кэнсиэрдэргэ көрөр Күннэйим «Нарыйаана, намыын намчы эдьиийдэрим» ырыатынан эҕэрдэлээн ааста.
Афанасий Гуринов-Арчылан тылларыгар  «Махтал буоллун киниэхэ» Байбал Сэмэнэп толоруутугар, кулгаахтан да уостан түспэт буолан эрэр, кэлин хит дэнэр ырыаларга киирсииһи. Ити курдук, ырыа нарын долгунугар уйдаран олордохпутуна, Аскалон Павлов эмискэ төлө биэрэн саҥаран-иҥэрэн, эҕэрдэлии киирбэтэ дуо? Били ырыаҕа уйдаран, кырдьык ити барыта биһиэхэ ийэлэргэ ананар диэн манньыйа ууллан  кириэһилэҕэ  тиэрэ түһэн олордохпутуна, бэл үрдүбүгэр туох эрэ тоҕо барбытын курдук буолла,  соһуйаммыт чиккэс гынан көнө түстүбүт. Хата, тута сыанаҕа «Мин ырыам итэҕэй» диэн унаарытан, саас курдук сандааран  Далаана киирэн уоскутта.
Анатолий Бурнашов: «Бу сиргэ кэлбиппит үчүгэйдик олороору, кэрэҕэ тиксээри. Эдэркээн кыргыттар, ыал буолан, оҕо төрөтөн, дойдугутугар кэрэ кыргыттарда бэлэхтээн», — диэн ыллыктаах санаатын этэн туран, Виталий Андросов «Индигир» ырыатынан уоскуйа охсубут сүрэхпитин уулларда. Салҕыы «Утаппыт кэриэтэ олоруох» бэйэтин ырыатын Марианна Федотова-Намыына  ыллаан, кырдьык даҕаны, сөпкө этэҕин диэхпин баҕардым.
90-с уларыйыылаах сыллартан элбэх хит буолбут ырыалар ааптардара Иннокентий Гаврильев-Лэкиэс киирбитигэр киниэхэ махтана санаатым. Ырыа уонна ырыа ааптара биһиги олорор олохпут араас кэмнэрин ситимниир, ону ааһан араас кэмтэн үчүгэйин булан ырыа гынан үнүстүрүмүөҥҥэ тыаһатан,  оҥорон көтүтэригэр. Уонна билигин даҕаны «Тыыннаах дорҕоон» араадьыйа-телевидение биэриитигэр илэ сылаас эйгэни бэлэхтииригэр, оонньуу-тыаһата сылдьарыгар.
Екатерина, Алексей Егоровтар сыанаҕа киириилэрэ олоххо үйэлээх таптал туоһута буолбуттара ыраатта. Кинилэр бааллар — айымньылаах үлэлэринэн бииргэ хардыылаан, көрөөччү тапталын иҥэриммит ырыаһыт ыаллар. Ханнык да тиэмэлээх кэнсиэргэ кинилэри истибэтэхпинэ-көрбөтөхпүнэ, кэнсиэр көрдүм дии санаабат буолбут эбиппин. Чахчы даҕаны, ыраҕыт ырыа буолан ыллыы турун.
Тута саалаҕа  ытыс тыаһа умулла илигинэ «Сахам сирин кыргыттара» ырыатынан бэрт чэпчэкитик, сайыҥҥылыы сайбайан Варя Ларионова киирэр. Игорь Егоров Айыы Уолун ырыатын «Бэлэхтээ эн миэхэ…» көрөөччүлэр тэҥҥэ ылластылар. Виктор Хон тылларыгар, бэйэтин матыыбыгар Өркөн «Махтанабын эн бааргар» уҥа-таала  айманан ааста. Сахаайа сырыы аайы, саҥа ырыанан көрөөччүтүн үөрдээччи, бу да сырыыга В.Хон тылларыгар «Таптал сылаас сыламнара» ырыатын бэлэхтээтэ. Кини олус үлэһит ырыаһыт, бэйэтигэр өрүү ирдэбиллээхтик сыһыаннаһара көстөр. Кэнсиэри анаан сыанаҕа тахсарга чочуллан оҥоһуллубут курдук, «Саха-Виктория» эрэдээктэрэ Анна Исакова уонна «Саха» иһитиннэрэр, көрдөрөр хампаанньа тутаах дииктэрэ Георгий Белоусов иилээн-саҕалаан ыыттылар.
Дьэ, ити курдук, аан дойду дьахталларын күнүгэр ураты тыыннаах, олус үчүгэй кэнсиэри көрөн дуоһуйдум. Саха ырыата, матыыба  үүнэн иһэринэн киэн тутуннум.

«Саха сирэ», edersaas.ru саайтка анаан Елизавета Попова-Бааттаах Кырата.
Ааптар хаартыскалара

 

0
0
Telegram @edersaas20