Биир кэлим эксээмэни 8 498 оҕо туттарыаҕа

Ааптар: 
Бөлөххө киир:

Оскуолаларга эксээмэннэр саҕаланнылар. Онон сибээстээн СӨ үөрэҕин уонна билимин миниистирэ Ирина Любимова, СӨ үөрэх хаачыстыбатын кэтээн көрөр киин салайааччыта Надежда Попова пресс-кэмпириэнсийэ биэрдилэр.

edersaas.ru

Былырыын, иллэрээ сыл дьаҥынан сибээстээн эксээмэн туттарар пууннарга ирдэбил кытаанах эбит буоллаҕына, быйылгыттан сымнатыыны биллэрбиттэр. Ол курдук, эксээмэн туттарааччылары саахыматынан олордубат, икки ардынааҕы арыттарын ирдээбэт буолбуттар. Арай, маасканы кэтиини, харыстанар сириэстибэни туһаныыны хаалларбыттар.

Тохсус кылааһы бүтэрээччилэр нуучча тылын, математиканы (булгуччу) итиэннэ эбии икки биридимиэти талан туттараллар.

“Тохсус кылаастарга эксээмэн ыам ыйын 19 күнүттэн саҕаламмыта. Эрэсиим быһыытынан баран иһэр.

11-с кылааһы бүтэрээччилэр булгуччу нуучча тылын, математиканы (судургутутуллубут, уустугурдуллубут) уонна бэйэлэрин баҕаларынан биридимиэттэри талаллар. Биир оҕо ортотунан үс-түөрт эксээмэни туттарар”, — диэн Ирина Любимова этэ.

Былырыын Саха сирэ интэриниэтинэн кэлбит матырыйаалы (КИМ) аудиторияҕа миэстэтигэр бэчээттээн таһаарыыны дойдуга бастакынан тэрийбитин иһитиннэрдэ. Быйыл ити холобуру 9-с кылаастарга туһаныахпыт диэн ыйда.

“Эксээмэн тутар пууннары тэрийиигэ айылҕа усулуобуйатын (уу кэлэр түгэнигэр) уонна 58 оскуола хапытаалынай өрөмүөҥҥэ барарын учуоттаабыппыт”, — диэн миниистир бэлиэтээтэ.

СӨ үөрэх хаачыстыбатын кэтээн көрөр киин салайааччыта Надежда Попова иһитиннэрбитинэн, быйыл 9-с кылаас кэнниттэн 12 204 оҕо эксээмэн туттарар. Онтон 11-с кылаас кэнниттэн 8 498 киһи эксээмэн туттарарын туһунан биллэрбит. Итинтэн 7 901 — быйыл оскуоланы бүтэрээччи, 14 – орто анал үөрэх устудьуона, 497 – урукку сылларга оскуоланы бүтэрбит.

“Бүтүн Арассыыйатааҕы бэлэмнэнэр икки тэрээһиҥҥэ кытынныбыт, эксээмэҥҥэ туһаныллар тиэхиньикэни барытын бэрэбиэркэлээтибит. Эксээмэн туттарар пууннар бары 100 бырыһыан кумааҕынан, картриджынан хааччыллыбыттара.

Эрэгийиэннээҕи уопсастыбаннай 1036 кэтээн көрөөччү анал үөрэҕи ааһан, аккредитацияланна”, — диэн эттэ.

Манна даҕатан эттэххэ, миниистир иһитиннэрбитинэн, 2021 сыл түмүгүнэн Саха Өрөспүүбүлүкэтэ суударыстыбаннай түмүктүүр эксээмэни сырдатыыга дойду үрдүнэн 15 бастыҥ эрэгийиэн кэккэтигэр киирбит.

Биир кэлим эксээмэн алын баала:

Нуучча тыла (аттестат ыларга) – 24 баал

Нуучча тыла (үрдүк үөрэххэ туттарсарга) – 36

Математика (уустугурдуллубут) – 27 баал

Обществознание – 42 баал

Физика – 36 баал

Химия – 36 баал

Биология – 36 баал

История – 32 баал

Литэрэтиирэ – 33 баал

География – 37 баал

Информатика уонна ИКТ – 40 баал

Омук тыллара – 22 баал.

Людмила ПОПОВА, “Саха сирэ” хаһыат, edersaas.ru

Хаартыска: СӨ Үөрэҕин уонна билимин министиэристибэтиттэн.

+1
0
+1
0
+1
0
+1
0
+1
0
+1
0
+1
0