Үөрэх дьыла номнуо түмүктэнэн, сорох абитуриеннар устудьуон аатын сүгэн, уопсайга докумуоннарын хомуйса, атыттар үөрэхтэн матан, салгыы хайдах дьаһаналларын толкуйдуу сылдьаллар.
edersaas.ru
Ол эрээри, оҕо үрдүк үөрэххэ киирбэтэх буоллаҕына аан барыта сабыллыбытын курдук толкуйдуур сыыһа. Орто үөрэх ахсаана биллибэт элбэх, букатын сүүрбэттэн тахса улууһу хабан олороллор. 2019-2020 үөрэх дьылыгар 6000-тан тахса бүддьүөт миэстэтэ көрүллүбүтэ. Атырдьах ыйын ортотугар диэри докумуону туталлар. Эбэтэр кэтэхтэн да киириэххэ, төлөбүрдээххэ да барыахха сөп. Кэмниэ кэнэҕэс аармыйаҕа ытык иэһи төлөөн кэлэн баран, кэлин даҕаны туттарсыан сөп. Маныаха абитуриеннарга да, төрөппүттэргэ даҕаны үгүс ыйытыылар үөскүүллэр. Сүрүннээн биир кэлим эксээмэни (ЕГЭ) эһиил эмиэ туттараллар дуо, диэн туоһулаһаллар. Рособрнадзор бэйэтин саайтыгар абитуриеннар, төрөппүттэр эксээмэҥҥэ сыһыаннаах элбэхтэ биэрэр ыйытыыларыгар хоруйдары таһаарар. Туһааннаах ыйытыыга маннык хоруйу биэрбиттэр: “Өскөтүн эксээмэҥҥэ ылбыт баала үрдүк уонна атын үөрэххэ (исписээлинэскэ) туттарсар санаата суох буоллаҕына, хаттаан эксээмэни туттарымыан сөп. Тоҕо диэтэххэ, биир кэлим эксээмэн (ЕГЭ) баала түөрт сылга диэри дьиҥнээҕинэн (действительны) ааҕыллар. Ол эрээри, абитуриент баалым намыһах, сөбүлүүр үөрэхпэр киирэрбэр тиийбэт эбит дии саныыр түгэнигэр, баалын үрдэтэр инниттэн саҥаттан туттарара ордук”, — диэн суруллар. Ол эбэтэр, хаһан баҕарар эксээмэнин хаттаан туттарыан сөп. Биир үчүгэйэ диэн – ханнык сыллааҕы баала үрдүгүн талар кыахтаах. Онон үөрэххэ туттарсар хаһан даҕаны хойут буолбатах.
Людмила ПОПОВА, “Саха сирэ” хаһыат, edersaas.ru
Хаартыска — интэриниэттэн.