Бу күннэргэ Үөрэҕи уонна науканы кэтээн көрөр федеральнай сулууспа биир кэлим эксээмэн (ЕГЭ) ыытыллар болдьоҕун саҥардыллыбыт бырайыагын таһаарда. Онно ыйылларынан, биир кэлим эксээмэн быйыл икки түһүмэҕинэн барар.
Сүрүн түһүмэх (основной) ыам ыйын 31 – от ыйын 2 күннэригэр, эбии түһүмэх (дополнительный) от ыйын 12-17 күннэригэр.
Сүрүн түһүмэх:
Ыам ыйын 31 күнэ – география, литэрэтиирэ, химия;
Бэс ыйын 3 уонна 4 күннэрэ – нуучча тыла;
Бэс ыйын 7 күнэ – математика (профильнай);
Бэс ыйын 11 күнэ – история, физика;
Бэс ыйын 15 күнэ — обществознание;
Бэс ыйын 18 күнэ – биология, омук тыла (суругунан);
Бэс ыйын 21 уонна 22 күннэрэ – омук тыла (тылынан);
Бэс ыйын 24 уонна 25 күннэрэ – информатика уонна ИКТ (көмпүүтэринэн)
Бэс ыйын 28, 29 уонна от ыйын 2 күннэрэ – эрэсиэрбэ күннэр.
Эбии түһүмэх (дополнительный):
От ыйын 12, 13, 14 күннэрэ – эбии түһүмэх.
От ыйын 17 күнэ – эрэсиэрбэ күнэ.
Түмүктүүр судаарыстыбаннай эксээмэни (ГВЭ-11) быйыл сыллата туттарар бырааптаах дьон эрэ буолбакка, үрдүк үөрэххэ туттарсар санаалара суох оҕолор эмиэ туттараллар. Кинилэр икки сүрүн бирдимиэти — ыам ыйын 25 күнүгэр нуучча тылын, ыам ыйын 28 күнүгэр математиканы туттараллара ирдэнэр. Эрэсиэрбэҕэ күннэр – бэс ыйын 8 күнэ (нуучча тыла), бэс ыйын 10 күнэ (математика).
Түмүктүүр судаарыстыбаннай эксээмэҥҥэ (ГВЭ)-11 икки эбии түһүмэх көрүллүбүт. Ол курдук, сүрүн түһүмэххэ доруобуйаларынан эбэтэр атын убаастанар төрүөтүнэн кыайан эксээмэн туттарбатах оҕолор от ыйын 13 уонна 17 күннэригэр нуучча тылын итиэннэ математика эксээмэнин туттарыахтарын сөп.
Балаҕан ыйын 3-17 күннэригэр эрдэ убаастанар төрүөтүнэн уонна нуучча тылыгар биир кэлим эксээмэҥҥэ (ЕГЭ) ирдэнэр алын баалын (минимальный порог) кыайан ылбатах дьон туттараллар.
“Саха сирэ” хаһыат, edersaas.ru