Биир кэлим эксээмэҥҥэ сайабылыанньаны тутуу тохсунньунан түмүктэнэр
Тохсунньу — эксээмэн туттарааччыларга саамай быһаарыылаах ый. Ол курдук, ханнык эксээмэни талалларыттан үөрэххэ туттарсыылара быһаччы тутулуктаах. Дьэ, манна тугу учуоттуур ирдэнэрий?
edersaas.ru
“Саха сирэ” хаһыат сыллата ыам ыйыгар М.К.Аммосов аатынан Хотугулуу-Илиҥҥи федеральнай университеты кытта төлөпүөнүнэн быһа сибээһи тэрийэр. Тус бэйэм икки сылы быһа сибээскэ кыттыбыт киһи быһыытынан, оскуоланы бүтэрээччилэр биир түгэҥҥэ болҕомтолорун уураллара наада эбит диэн түмүккэ кэлбитим. Ол тугуй? Быһа сибээс кэмигэр төрөппүттэр төлөпүөннээн эксээмэннэрбитин сыыһа талан кэбиспиппит эбит дэһэллэр. Ол курдук, сорох оскуоланы да бүтэрээччи оҕолор, төрөппүттэр даҕаны сыыһа өйдөөн дуу, эбэтэр иһитиннэрии ситэ тиийбэтиттэн дуу, холобура, математикалаах үрдүк үөрэххэ туттарсар эрээри, математика профильнай көрүҥүн буолбакка, базовай математиканы талан кэбиһэллэр эбит. Онон, бастатан туран, өскөтүн үөрэххэ туттарсааччы математика ирдэнэр үрдүк үөрэҕэр киириэн баҕарар түгэнигэр, математика профильнай көрүҥүн талара булгуччулаах. Маныаха туһааннаах үөрэххэ ханнык эксээмэн ирдэнэрин булгуччу эрдэттэн билсэр инниттэн, үрдүк үөрэхтэр кыһаларын саайтарын үчүгэйдик сыныйан көрөр ордук. Сайабылыанньаны олунньу 1 күнүгэр эрэ диэри ылалларын умнумаҥ.
Иккиһинэн, оскуоланы бүтэрээччи (математикаттан уонна нуучча тылыттан ураты) хас даҕаны биридимиэти таллаҕына, эксээмэҥҥэ бэлэмнэниитигэр ыарырҕатыан сөп эрээри, абитуриент хас даҕаны үөрэххэ туттарсар кыаҕа үрдүүр. Маныаха эмиэ оҕо туттарсыан баҕарар идэлэринэн туһааннаах үрдүк үөрэхтэр саайтарын, ханнык эксээмэннэр ирдэнэллэрин билсэр наада.
Оскуоланы бүтэрээччилэргэ, үөрэххэ туттарсааччыларга судургу буоларын курдук, Саха сиригэр баар судаарыстыбаннай үрдүк үөрэх тэрилтэлэрин саайтарын аадырыһын ыйабыт:
- М.К.Аммосов аатынан Хотугулуу-Илиҥҥи федеральнай университет https://www.s-vfu.ru/
- Тыа хаһаайыстыбатын академията http://ysaa.ru/
- Култуура уонна искусство Арктикатааҕы института http://agiki.ru/
- Чурапчытааҕы физкултуура уонна спорт института http://www.chgifkis.ru/ru/index.php
Бэлиэтээн эттэххэ, урукку сылларга оскуоланы бүтэрбит аттестааттаах дьон, математикаҕа биир кэлим эксээмэни туттарар түгэннэригэр, математика профильнай көрүҥүн эрэ туттарар кыахтаахтар. Саҥа уларыйыы 2019 сылтан киирдэ. Итиэннэ оскуоланы урукку сылларга бүтэрбиттэр биир кэлим эксээмэни (ЕГЭ) сүрүн болдьох иннинээҕи түһүмэххэ (досрочный период) уонна сүрүн түһүмэх (основной период) резервнэй күннэригэр эрэ туттарар кыахтаахтар. Ол аата, 2019 сылга урукку сылларга бүтэрбиттэр биир кэлим эксээмэни (ЕГЭ) кулун тутар 20 – муус устар 10 күннэригэр (досрочный период) уонна бэс ыйын 17 – от ыйын 1 күннэригэр (резервные дни основного периода) эрэ туттараллар.
Биир кэлим эксээмэн (ЕГЭ-2019) туһунан мунаарар түгэннээх буоллаххытына, “ЕГЭ быһа сибээһэ” 8-(4112)-42-10-46 төлөпүөнүнэн ыйыталаһыаххытын, оттон суругунан ыйытыыларгытын ege_sakha@mail.ru электроннай аадырыска ыытыаххытын сөп.
Людмила ПОПОВА, “Саха сирэ” хаһыат, edersaas.ru
Хаартыска — интэриниэттэн.