Биир кэлим эксээмэн чугаһаан, оҕолор, төрөппүттэр ыйытар боппуруостара үксээтэ. Олортон сүрүннэригэр СӨ Үөрэҕин уонна наукатын министиэристибэтин уопсай үөрэхтээһиҥҥэ салаатын салайааччытын солбуйааччы Туйаара Абрамоваттан хоруйдууругар көрдөстүбүт.
Ыйытыы: Аттестат ыларга биир кэлим эксээмэн (ЕГЭ) баала дьайар дуо?
Хоруй: Биир кэлим эксээмэн (ЕГЭ) бэрээдэгэр уларыйыылар туһунан бигэргэтиллибит бирикээс СӨ Үөрэҕин уонна наукатын министиэристибэтигэр билиҥҥитэ кэлэ илик. РФ Үөрэҕириигэ миниистирэ Сергей Кравцов итиэннэ Үөрэҕи уонна науканы кэтээн көрөр федеральнай сулууспа (Рособрнадзор) салайааччыта Анзор Музаев иһитиннэрбиттэринэн, былырыыҥҥы курдук эмиэ аттестакка биир кэлим эксээмэн (ЕГЭ) баала дьайбат. Гынан баран маннык: өскөтүн оҕо үрдүк үөрэххэ туттарсабын, онон биир кэлим эксээмэни (ЕГЭ) туттарабын диир түгэнигэр, кини нуучча тылын биридимиэтигэр ирдэниллэр алын баалы хайаан даҕаны ылыахтаах. Оччотугар аттестат бэриллэр. Урукку сылларга математикаҕа эксээмэн эмиэ ирдэнэрэ дии, быйыл ирдэммэт.
Ыйытыы: Өскөтүн нуучча тылыгар биир кэлим эксээмэҥҥэ (ЕГЭ) ирдэниллэр алын баалы кыайан ылбатахпына — “бырабааллаан” кэбистэхпинэ хайыыбыный?
Хоруй: Эппитим курдук, күн бүгүн, уларыйыылар туһунан бигэргэтиллибит бирикээс министиэристибэҕэ кэлэ илик. Ол эрээри, быйыл “традиционнай” эксээмэни туттаран аттестаты ылыахтарын сөп буолуо.
Ыйытыы: Мэтээлинэн бүтэрээччилэргэ быйыл туох ирдэбил киириэҕэй?
Хоруй: Эппитим курдук, барыта биир кэлим эксээмэн (ЕГЭ) бэрээдэгэр уларыйыылартан тутулуктаах. Үөрэҕи уонна науканы кэтээн көрөр федеральнай сулууспа (Рособрнадзор) мунньаҕар биир кэлим эксээмэн баала учуоттаныахтаах диэн иһитиннэрбиттэрэ. Ол гынан баран, ол хас баал буолара, эрэгийиэн бэйэтэ быһаарарын дуу, федеральнай салалта быһаарарын дуу, судаарыстыбаннай түмүктүүр эксээмэни (ГВЭ) туттарбыт оҕо мэтээл ылар кыахтааҕын дуу, суоҕун дуу чопчу биллэрэ иликтэр. Эксээмэн баала сабыдыаллыахтаах эрэ диэн эппиттэрэ. Эксээмэн бэрээдэгэр уларыйыыны ыыттахтарына эрэ тустаах ыйытыыларга чопчу хоруйу биэрэр кыахтаахпыт.
Людмила ПОПОВА, “Саха сирэ” хаһыат, edersaas.ru
Хаартыска: khakasia.info