Бэҕэһээ биир кэлим эксээмэни (ЕГЭ) уонна үрдүк үөрэх кыһаларыгар докумуону тутар хампаанньаны тэрийии боппуруостарыгар тэрилтэлэр икки ардыларынааҕы мунньах буолбут. Мунньах түмүгэр, биир кэлим эксээмэн (ЕГЭ) араспысаанньатын оҥорбуттар.
Ол курдук, бэс ыйын 29-30 күннэригэр барыллаан боруобалыыр эксээмэннэри ыыталлар. Биллэрин курдук, быйыл, үөрэх, сибээс тэрилтэлэрин сэргэ Роспотребнадзор эмиэ эксээмэн хаамыытын бэлэмнэһиэхтээх. Туох баар санитарнай-эпидемиологическай ирдэбил тутуһуллуохтаах.
Боруобалыыр эксээмэн кэнниттэн тута, от ыйын 3 күнүттэн күүтүүлээх-кэтэһиилээх эксээмэннэр саҕаламмытынан барыахтара. Ол курдук, от ыйын 3 күнүгэр – география, литэрэтиирэ уонна информатика, от ыйын 6 уонна 7 күннэригэр – нуучча тыла, от ыйын 10 күнүгэр – математика (профиль), от ыйын 13 күнүгэр – история, физика, от ыйын 16 күнүгэр – обществознание, химия, от ыйын 20 күнүгэр – биология уонна омук тыла (суругунан чааһа), от ыйын 22 уонна 23 күннэригэр – омук тыла (тылынан чааһа) буолуохтара.
Эксээмэн эрэсиэрбэҕэ күннэрин от ыйын 24 күнүгэр (нуучча тылыттан уонна омук тылыттан ураты), от ыйын 25 күнүгэр үөрэх бары биридимиэттэрин туруорбуттар.
Убаастанар төрүөтүнэн от ыйыгар эксээмэни кыайан туттарбатах дьон атырдьах ыйын саҥатыттан эбии түһүмэх (дополнительный период) кэмигэр туттарыахтарын сөп. Онон үрдүк үөрэххэ докумуону биэрэргэ баттаһыахтара диэн суоттууллар.
Эксээмэн барыта таҥыллыбыт араспысаанньанан бардаҕына, коронавирус балаһыанньата этэҥҥэ буоллаҕына үрдүк үөрэх кыһалара үөрэх дьылын үгэс быһыытынан балаҕан ыйын 1 күнүттэн саҕалыыр былааннаахтар.
Людмила ПОПОВА, “Саха сирэ” хаһыат, edersaas.ru