“Биир күн” – Арассыыйаҕа саҥа сүүрээн

17.11.2017
Бөлөххө киир:

СӨ култуураҕа уонна духуобунай сайдыыга миниистирэ Владимир Тихонов соторутааҕыта “Биир күн” күрэһи бэлэмниир үлэ хаамыытын дьүүллэһэр мунньаҕы салайан ыытта.  Ол туһунан министиэристибэ пресс-киинэ иһитиннэрдэ.

edersaas.ru


“Биир күн” этно-поп хайысхалаах аныгы ырыаҕа эрэгийиэннэр икки ардыларынааҕы интерактивнай күрэс – өрөспүүбүлүкэ, Арассыыйа да таһымыгар урукку өттүгэр суох бырайыак. Күрэһи СӨ Култуура уонна духуобунай сайдыы министиэристибэтин быһаччы өйөбүлүнэн, Эстрада судаарыстыбаннай тыйаатыра уонна “Саха” НКИХ тэрийэллэр. Манна этно-поп хайысхаҕа үлэлиир, ол эбэтэр бэйэлэрин омуктарын уратытын тута сылдьар аныгы ырыаһыттар кытталлар.

Бастакы күрэскэ Саха сирин таһынан 10 эрэгийиэн кыттарга сөбүлэҥин биллэрбитэ: Алтаай, Татарстаан, Тыва, Удмуртия, Чувашия, Башкортостан, Бурятия, Кырыым Өрөспүүбүлүкэлэрэ, Чукотка уонна Ямал-Ненец автономнай уокуруктара.

Бастакы кэнсиэр уонна тэлэбииһэргэ устуу сэтинньи 24 күнүгэр “Триумф” спорт киинигэр буолуоҕа. Тохсунньуга куоластааһын саҕаланыа: лоп курдук биир ый устата 11 ырыаһыт 2-лии ырыатын дьон дьүүлүгэр таһаарыа. Балар истэригэр “Тюрквидение” курдук таһымнаах күрэс кыайыылаахтара, “Главная сцена”, “Голос” курдук улахан бырайыактар кыттыылаахтара бааллар. Саха сирин аатын Айсен Аммосов көмүскүүр (кинини он-лайн куоластааһын көмөтүнэн өрөспүүбүлүкэ олохтоохторо талбыттара).

Күрэс хаамыытын дойду 11 эрэгийиэнигэр 16 мөлүйүөн киһи тэлэбиисэринэн кэтээн көрүө, куоластыа, кими эрэ өйүө, ким эрэ туһугар ыалдьыа.

Ол кэннэ, олунньуга – түмүктүүр Гала-кэнсиэр. “Саҥа ырыаҕа” курдук, икки кыайыылаах талыллыа. Биирэ – СМС-куоластааһынынан, иккиһэ – дьүүллүүр сүбэ быһаарыытынан.

“Биир күн” күрэһи тэрийиигэ култуура өрөспүүбүлүкэтээҕи, судаарыстыбаннай тэрилтэлэрэ, тыйаатырдар, айар кэлэктииптэр бары кытталлар. Холобур, күрэс сүрүн режиссера Р.Тараховскай этэринэн, аҥаардас “Биир күн” үөрүүлээх аһыллыытыгар Опера уонна балет, Саха тыйаатырдара, Үҥкүү, Аҕыйах ахсааннаах хотугу норуоттар, Үүнэр көлүөнэ, Эстрада тыйаатырдара, Н.Петров аркыастыра, “Кыл-кырыымпа”, “Айархаан” бөлөхтөр, Хатылаевтар, АГИКИ, ХИФУ, ССТХА, Култуура колледжын устудьуоннара уо.д.а. кыттыахтаахтар. “Триумф” уораҕайыгар 26 миэтэрэ кэтиттээх сыана оҥоһуллуохтаах (тэҥнэбилгэ: Опера уонна балет тыйаатырын сыанатын үлэлиир кэтитэ – 14 миэтэрэ). Уотун-күөһүн, тыаһын-ууһун “Звук и свет” фирма дьаһайыа.

СӨ Эстрада судаарыстыбаннай тыйаатырын дириэктэрэ Алексей ЕГОРОВ:

–  Бу күрэһи 2 сыл устата бэлэмнээтибит. Аата, тутула элбэхтик уларыйа сылдьыбыта. Ол эрээри сүрүн ис хоһооно уларыйбат – күрэс Саха сирин таһыгар тахсыахтаах, эрэгийиэннэр икки ардыларынааҕы таһымнаах буолуохтаах. Үлэбит түмүгэ, дьэ, көстөн эрэр. СӨ Култуураҕа уонна духуобунай сайдыыга министиэристибэтин сакааһынан, үп-харчы уонна тэрээһин өттүнэн быһаччы өйөбүлүнэн, биһиги – Эстрада судаарыстыбаннай тыйаатыра уонна “Саха” НКИХ – сэтинньи 24 күнүгэр этно-поп хайысхалаах аныгы ырыа эрэгийиэннэр икки ардыларынааҕы күрэһин тэрийэбит. Манна даҕатан эттэххэ, “Биир Күн” диэн тыл бары түүр тыллаах омуктарга биирдик иһиллэр, биир өйдөбүллээх. Онон, күрэс аата олус табылынна дии саныыбын.

СӨ Култуураҕа уонна духуобунай сайдыыга министиэристибэтэ күрэскэ кыттар эрэгийиэннэр Култуураҕа министиэристибэлэрин кытары сөбүлэһии түһэрсэн турар. Оттон “Саха” НКИХ, биһиги сүрүн тэлэбиидэнньэбитин үлэлэтэрин быһыытынан – бу эрэгийиэннэр тэлэбиидэнньэлэрин кытары. Онон, тохсунньуга биһиги күрэспитин 11 эрэгийиэҥҥэ барытыгар көрүөхтэрэ.

Хас эрэгийиэн аайыттан биирдии эрэ киһи кыттар. Тохсунньу устата СМС-куоластааһын ыытыллыа. Оттон Дьүүллүүр сүбэ бэйэтин кыайыылааҕын 2018 сыл олунньу 17 күнүгэр буолар түмүк кэнсиэргэ быһаарыа. Кыайыылаахтары таһынан, лауреаттар уонна дипломаннар ааттаныахтара.

Дьүүллүүр сүбэҕэ кыттааччы эрэгийиэннэр бэрэстэбиитэллэрэ киирэллэр. Билигин дойдуга биллэр-көстөр сорох артыыстары кытары кэпсэтии бара турар. Сатаннаҕына, олунньу 17 күнүгэр күрэс Дьүүллүүр сүбэтин Арассыыйа аатырбыт артыыһа салайыаҕа. Ол “Биир Күн” күрэс эрэ буолбакка, Саха Өрөспүүбүлүкэтин аатын-суолун үрдэтэргэ төһүү буолара саарбаҕа суох.

 

“Биир күн” күрэс – Арассыыйа эстрадатын эйгэтигэр, шоу-биисинэһигэр саҥа, урут суох хамсааһын. Бу күрэс көмөтүнэн, дойду араас эрэгийиэнигэр, ол иһигэр биһиги Сахабыт сиригэр, олорор, үлэлиир, айар-тутар артыыстар ааттара-суоллара киэҥ эйгэҕэ биллэн-көстөн барыа, кинилэр салгыы сайдалларыгар кыах үөскүө. Култуура уонна духуобунай сайдыы министиэристибэтэ оннук сыалы-соругу туруорар уонна онно туһуланан үлэлиир.

 edersaas.ru

 

+1
0
+1
0
+1
0
+1
0
+1
0
+1
0
+1
0